第一份工，唔止係一份工。對職場新鮮人嚟講，第一份工作往往係人生重要轉捩點。佢唔止影響你嘅履歷，更可能塑造你對職場、對自己嘅理解。但你會點揀？係睇人工？睇公司名氣？定係睇學習機會？

曾任職 Google、微軟、蘋果管理層嘅李開復，就曾經喺 Facebook 分享咗8個選擇第一份工嘅建議，值得每位新鮮人參考：

1. 學習優先，公司文化要睇清
   選擇一間重視培訓、唔會當員工係「賺錢工具」嘅公司，遠比高薪更重要。好老闆、好文化，會令你成長得更快。
   
   
2. 睇五年後，而唔係只睇第一年
   搵一份可以學到新技能、有發展潛力嘅工作，勝過短期高薪。你要問自己：五年後，我會變成點？
   
   
3. 唔知興趣唔緊要，搵一份幫你搵到興趣嘅工
   如果你已經知道自己想做咩，咁就直行直撞；如果未清楚，就揀一份可以探索、試驗、發現嘅工作。
   
   
4. 實習係試錯的最佳時機
   多嘗試固然好，但最好喺大學時期就透過實習去試，唔好等到畢業先開始摸索。
   
   
5. 資料搜集唔可以懶
   搵工唔係等機會，而係要主動出擊。上網查資料、問學長、做實習、甚至親身去公司門口了解，都係值得做嘅功課。
   
   
6. 內部轉職都係一種可能
   有啲公司提供內部輪調機會，唔一定要跳槽先可以轉型。識得喺公司內部探索，可能更穩陣。
   
   
7. 第一份工唔係終身契
   根據統計，21世紀嘅人平均會轉工四至五次。第一份工係起點，但唔係終點。
   
   
8. 綜合考慮：條件、天賦、興趣、學習機會
   最重要嘅唔係人工，而係你能唔能夠學到嘢。學校教你理論，但真正嘅職場技能，要靠工作中慢慢累積。

唔好期望公司只係培養你，你都要付出。第一份工通常係基層職位，做好份內事，先有機會學更多、升得更快。

文：Jamie＠ECjobsonline 編輯部