年頭年尾，唔少公司都會出現走人潮，一有人要離職，又點少得係咁咦象徵式派下散水餅比同事食呢？ 派散水餅呢個傳統其實都興左好耐，但近年就有不少人開始質疑其實離職係咪真是有要派散水餅的必要呢？ 原來派件西餅都是一門藝術同學問！派跟不派對你自己和公司同事都可以有好大差異㗎 ！ 你就嚟離職轉工 ？ 咁就更加要留意以下10大原因為什麼要派和不派散水餅喇 ！

派散水餅:
原因1.  建立形象最重要
形象呢家野，聽落好像好虛無縹緲，但真是好重要 ！ 臨近last day，如果你有提前好好準備，唔走傳統西餅路線，買啲特別啲嘅蛋糕同飲品，夾啱時間同班同事歎下餅飲下咖啡，同事食得開心大讚你買的散水餅之餘，你在他們心目中都一定會留低左個好好的印象，就算遲啲唔記得左你個名，都一定會記得你件散水餅好好食，大家圍埋一齊的時候氣氛好好等等。相反，人對於唔好嘅野印象總是會特別深刻，如果你只是好hea地去買幾打一式一樣食過無數咁多次的西餅，又好hea咁同人講買左餅自己去pantry攞，個個都會記得曾經有個人咁唔上心西餅又好難食㗎喇 ！ 個人image呢家野，就睇你care唔care喇 ！

原因2.  始終一場同事
無論你對公司的歸屬感高唔高，同同事之間的感情好不好，人與人之間的相遇點講都是一種奇妙的緣份，若果你不相信緣份，咁都回想下當初你入職的時候，一班同事總算提點過你幫過你，念在這份同事愛和提攜之恩，請件蛋撻都不是好過份姐！

原因3.  派散水餅是離職前必做的傳統習俗
派散水餅這個離職傳統在好耐以前就已經有，當大家已經習慣左同事離職前有散水餅食這個習俗，你不派散水餅就真是會有點突兀，甚至比同事覺得你是對公司或者同事有不滿，所以在last day連件餅都不願意請大家食。為免產生同事之間的誤會，都是跟番傳統派下散水餅比較保險！

原因4. 表達誠意
一般人可能會覺得同事離職係做得不開心或者太辛苦，但好多新一代職場新鮮人唔做可能都只是想轉一轉工作環境吸收多點不同的工作經驗。派散水餅除了可以避免不必要的誤會，都算是對公司和同事的一種謝意，離職前花啲心思派散水餅，勝過千言萬語，當是一份工作的一個告別儀式。

原因5.  識做唔識做睇你喇！
職場上有好多潛規則，離職前要派散水餅都可能是其中一條冇標示出來的規定，但派散水餅的確可以為自己帶來丁點着數。對於實習生同職場新鮮人，透過派散水餅，可以比僱主和同事知道你懂得人情世故，絕對不是一個工作態度欠認真、唔捱得的八、九十後。而且，留個好印象給僱主和同事，都是一個建立良好人際關係的好方法。當然，而家啲人對於散水餅的款式都好高要求，價錢太平太貴款式太普通太特別都會比人話，散水餅要派得價錢適中又有心思，真是好考起所有人㗎！

唔派散水餅:
原因1.  做左唔係好耐都要派？
好多啱啱出來社會工作的青年人和實習生都會問這個問題，做左一年都沒有都要派散水餅，好像好小題大做喎 ！ 況且，做了一頭半個月連同事個名都未記得就要懶係熟咁請他們食餅，氣氛都十分尷尬，諗諗下做了不是很耐的人，離職時散水餅都是不派好過派喇！

原因2.  嘥錢買人情？
有人會覺得花少少錢請班同事食件餅買個好印象都未免不是一件伐算的事，但人與人之間的交情又是否真是可以用金錢來衡量呢 ？ 如果你平時工作態度認真、有熱誠又肯比心機學習，僱主和同事自然會對你留下一個好好的印象，又洗乜搞咁多大龍鳳去討個人情番嚟呢？

原因3.  班同事都不會再見面
離職都要整件西餅比班不會再見面的同事食？表面上派散水餅雖然叫是做離職的禮節，但諗深一層的確是有點多餘的成份，特別是如果你與同事之間的關係都不是特別深厚，離職後都一定不會再約見面甚至聯宜，我都真是想不到請他們食西餅的原因喇。

原因4.  派完散水餅又有何人記得？
一年十二個月可以話每個月都有人入職又有人走，簡單做個估計，一間規模較大的公司有五個部門，每個部門每個月有三個人走，一個月都要食成十五件西餅，一年就食足一百八十件！真是認真誇張！而家問番你上個月A同事臨走嗰時請左大家食什麼牌子的西餅，你分分鐘都唔記得曾經有過A同事這個人啦！何況是他/她件餅！ 

原因5.  不做啲人做我又做嘅野！
而家好多人都行我行我素的路線，普羅大眾做嘅野我就偏偏不做！派散水餅這些沒有實際作用的行為更是如此！人請我就一定要請咩？派散水餅明明請人食餅是開心事，被請的反而諸多要求，仲嫌款式悶嫌太便宜，這些吃力不討好的事情，都是不做好過做。

社會就是這麼殘酷和難以適應，派件西餅都可以是一門需要畢生學習的藝術，等你知道原來請件西餅都可以買個人情、買個好印象，但我相信願意虛心受教、工作態度認真的人，離職時無論請不請散水餅，去到哪裡都一定會受到僱主和同事欣賞跟尊重，默默耕耘的一定會有出頭天。

文：Noelle So