你有壓力！我有壓力！無論做邊行，唔多唔少都會有壓力。雖然話出得嚟做野就預左要承受壓力，但克服壓力的方法有好多種，唔一定要死忍嘅！還掂都係要做，與其苦瓜乾咁嘅樣，不如正面啲面對佢啦！

1. 不把公事帶回家
雖然好多人會話日頭啲野做唔曬，無奈之下先把工作帶回家做，但大家有冇諗過，日頭的工作做不完，會唔會係自己在分配工作上做得未夠好，繼而拖低自己的工作效率呢？夜晚早啲休息，兼一早安排好schedule，第二日番工做野自然就會快手啲啦！記住，工作只係你生活的一部份，番到屋企，就應該係陪家人，或是屬於自己的私人時間，一切公事，就讓它留在公司，等到第二日上班再處理啦！

2. 時間管理要做好
上面都有提到，工作好多時做極都做唔完，問題往往是出自時間管理上。不要比工作安排你的日程，自主權應該由你控制，你的工作進度，你自己掌握。按照事情的緊急和重要程度安排工作順序，咁在工作上就唔洗再處於被動的狀態啦！

3. 凡事不要獨力承擔
好多人為左唔想比麻煩同事，樣樣野都選擇一個人處理，但你一個人孭曬啲野上身，咩壓力都自己承擔，到頭來你出事，咪又係要班同事和屋企人擔心。成班人一齊做野講求的是teamwork，公司內部的溝通十分重要，有咩唔怕攤出來同大家商量同分工，無需一個人把所有壓力都承擔。

4. 轉移視線 
凡事都有兩面，打工有壓力，亦都有佢的樂趣，例如在工作上設定個人目標，達成後自然能獲得滿足感，番工都有動力啲、有成就感啲啦 ! 另外，大家亦可以與同事建立關係，大家有咩喜怒哀樂，可以一齊分享，特別係有壓力的時候，有個傾訴的對象，自然就冇咁辛苦啦 ! 如果在工作上真係搵唔到可以轉移視線的對象，可以試下在工作以外尋找興趣，參加下烹飪班、織下頸巾、學下影相、彈下琴等等，讓崩緊的精神，可以得到休息、放鬆的時間。

5. 調節心理
壓力好多時都係來自自己，人一心想在最短的時間內做到最好，不容許犯錯，自然就會為自己帶來壓力。適當的壓力是一種推動力，但世界上無人是完美的，大家無需要求自己在工作上達致零錯失，受挫亦不要只會責怪自己，挫折都可以係一種鍛鍊，重要的是你能否勇敢面對失敗，找到壓力的根源，正面迎接挑戰。

壓力係人都有，唔需要刻意逃避，正視壓力的來源，坦然向同事、友人和家人傾訴，才能解決問題，否則在日積月累之下，終有一日會壓力爆煲啊 !

文：Noelle