香港打工仔每日平均花7至8個鐘頭坐喺辦公室，用電腦、覆email、打文件，長期缺乏運動，搞到10個有9個都有腰痠背痛、肩頸緊繃等症狀。唔少人仲會出現「滑鼠手」、「經濟艙腳」等職業病，但問題係——呢啲情況有冇得claim勞工保險？定係一定要喺工作期間「即場受傷」先有得賠？

根據《僱員補償條例》，你可能有得賠！
根據香港《僱員補償條例》，只要你係因工受傷、或喺上下班途中乘坐僱主提供交通工具時受傷，又或者被醫生診斷為患上法定職業病，都可以獲得法例保障，申請補償。
⚠️ 注意：外判工、臨時工、以及與僱主同住的親屬並不受此條例保障。

咩叫「法定職業病」？
法定職業病指係你喺合約期間從事某類型工作，因工作性質而患上指定疾病。只要符合條件，就可以申請補償。

職業病分三大類：

物理因素引致
最常見於辦公室打工仔，包括：

• 前臂痙孿（長期打字）
• 腕管綜合症（滑鼠手）
• 肘瘍、手瘍（重複手部動作）
• 熱內障、氣壓病（長期暴露於高溫或氣體環境）

生物因素引致
多見於接觸動物、植物或人體的工作，例如：

• 鸚鵡熱（禽類接觸）
• 農夫肺（農業工作）
• 退伍軍人症（水源污染）

化學因素引致
涉及化學物質中毒，包括：

• 氯化萘中毒
• 職業性白斑病
• 職業性哮喘（吸入刺激性物質）
• 呼吸道疾病（暴露於塵埃、蒸氣）

一旦確診職業病，可以點樣索償？
打工仔如因工受傷或患上職業病，可獲得以下補償：

• 工傷病假津貼：病假期間可獲4/5人工
• 永久喪失賺取能力補償：按傷勢、年齡、月薪計算
• 醫療費用：包括診症、治療、藥物等

📌 提醒：要盡快向公司申報、準時覆診、提供所需文件，唔好拖延！

僱主責任：唔止賠錢，仲要配合！
僱主應積極協助受傷員工，包括：

• 協助申報工傷
• 安排合理工作調動
• 提供復康支援或彈性工作安排

最重要：保護自己先係王道！
雖然職業病有機會索償，但身體始終係自己嘅。打工仔要記得：

• 定時伸展、休息
• 使用人體工學椅、鍵盤、滑鼠
• 有唔妥即刻睇醫生，唔好硬撐！

睇到呢度，你係咪都鬆一口氣？原來手部勞損、腰背痛都有機會申請補償！不過，最緊要都係保護自己，唔好等到出事先後悔。

文：Noelle＠ECjobsonline 編輯部