出嚟做嘢，慢慢就會發覺人脈真係好重要，例如搞一個event，你哋成team人都搞唔掂嘅嘢，可能打一個電話，搵一個人幫手，就咩都搞掂曬；又例如你有一件一直都想完成嘅事，奈何好似點努力都冇用咁，最後反而靠一個人、一段關係，就幫你達成到。冇錯，人脈的確係緊要，但自問年紀都唔細，除咗social啲之外，仲可以點樣擴闊社交圈子呢？
 
積極參與聚會
耐唔耐朋友圈都會搞啲gathering，可能你一直都唔係好積極去參與呢啲活動，但如果你想擴闊社交圈子，就更加要把握呢啲機會！一嚟咁耐冇見班舊同學或舊同事，大家可能有啲新動向，對方的工作可能與你有關連之外，你仲有機會透過呢班朋友去認識另一啲新朋友，大家有過一面之緣、交換過卡片，以後有咩都可以再聯絡，冇咩咪約大家去飲茶、睇戲囉！
 
參加不同活動
人大咗，真係難啲有機會識到新朋友，要識新朋友，就要靠自己主動踏出第一步喇！例如會唔會有興趣參加一啲活動班？好似跳舞、瑜伽、整甜品、攝影、烹飪，做義工等等，可以充實自己、培養興趣和專長之餘，仲可以趁機認識多啲唔同嘅人，話唔定你仲因而識到啲志同道合嘅人，大家成為一輩子嘅朋友添！
 
把握交流機會
大家平時去第二度旅行，都會覺得當地人特別熱情，成日都會撩你哋講嘢，一講就講成粒鐘，不過如果大家傾得投契，就不妨同對方交換埋contact，咁以後都可以保持聯絡，甚至再約返大家啊嘛！喺香港都一樣，有時去café同個老細傾得埋，咪一於交換埋卡片，當識多個朋友之餘，話唔埋工作上都可能有交涉呢！
 
轉換工作環境
咁講唔係叫你要為咗人脈而轉工，而係如果你仲後生、有本錢嘅話，就不妨出去闖蕩吓，嘗試多啲唔同嘅工種，咁除咗可以汲取多啲工作經驗之外，你仲可以認識多啲唔同嘅人，無論係舊同事定新同事，對你以後嘅職場生涯，都會有一定嘅幫助。
 
要擴闊社交圈子，其實一啲都唔難，啲小朋友咪又係落一落公園玩就識到朋友！所以，只要你肯主動踏出第一步，就自然可以認識到多啲新朋友，擴展你嘅人際網絡！

文：Noelle