無論喺邊度都好，如果能夠令人哋對自己留低好印象，日後的確係易辦事好多－呢個就係美國心理學家洛欽斯所講嘅「首因效應」：利用第一好印象造成先入為主嘅效果，幫助日後人際交往發展。突然講到咁學術又唔好咁驚住，用番簡單日常生活同人相處應有嘅行為，其實都可以實現到呢個理論！只需要做以下四招，相信可以為你喺同事心目中留下好印象。
笑臉迎人
人同人之間嘅關係發展真係好奇妙。啱啱未識任何同事嘅時候，雙方之間有一座無形嘅冰山。要融化呢座冰山，打破隔膜，最簡單直接嘅方法就係以一個溫暖嘅笑容同對方問好。呢個笑容俾到人一種親切嘅感覺，令到對方敢行近多一步同你接觸。再加上大部份人係辦公室工作都月亮面咁款，突然多咗個溫暖太陽真係可以為一天注滿正能量。有啲人就會話：「如果唔開心唔通都要笑住對人咩？」無人話你唔可以唔開心，之但係對住唔太熟嘅同事苦瓜乾咁嘅樣有助紓解情緒問題嗎？唔止冇，仲扣埋印象分，咁又值唔值呢？歌都有得你唱：「人人常歡笑」今日開始就笑多啲啦！有時笑笑下，皮肉都會變得同步笑出嚟㗎！
主動積極
唔識唔好扮識，一定要主動請教同事，並且虛心學習。如果嗰樣嘢只係瑣碎事，未必要問人，就要靠自己揾其他方法解決。職場上唔好怕洩底，如果有能力幫到其他同事，就問對方需唔需要幫忙。最後同事未必需要你幫忙，但就因為你一句簡單嘅關心，天使光環就可能從此跟住你。有時做嘢環境唔多唔少會有啲負能量，但有你多啲正面鼓勵團隊，做得到互相幫助，建立到友愛和諧嘅工作環境，仲唔對你有好印象咩！
儀容整潔
所謂「佛靠金裝，人靠衣裝」，第一印象嘅來源一定係外表。你嘅五官表情、衣著打扮就係人哋對你印象評分嘅範圍。每個人嘅打扮風格未必相似，但想令人留低好印象，最基本就係保持整潔。除咗頭髮要打理好，衫褲唔好太舊太皺，自己個位都要執到井井有條，唔好整到亂一亂。呢樣唔單止係對人嘅尊重，仲係對自己嘅尊重！想人尊重你，覺得你好，就要自己都做到呢點先得。
噴香水
噴香水會令人留低好印象，但前提係揀到款啱自己，而且氣味唔會過份濃烈嘅香水。果香、花香、特色香（例如：雲尼拿、棉花糖⋯⋯）任你揀，喺頸、手腕、衫等地方輕輕一噴，經過你身邊嘅人一聞到呢種香味就即刻諗起你，仲唔會有好印象咩！
最後提提大家，輕鬆建立到好印象都要繼續維持㗎！
文：小C
28 Nov 2025 
Contact Us
Notice
Back to Top
中文