如果有留意開我哋嘅讀者就知道，出去食飯有幾咁唔健康，無論係去茶記食碟頭飯定食燒味飯都總遇上高鹽高鈉嘅陷阱。而且日日食呢啲嘢都會厭啦，所以唔少打工仔都會帶愛心飯盒返公司食。
 
但係你又知唔知用錯飯盒隨時身陷另一危機中？消委會早前做咗個測試，喺市面搵咗25款可以放入微波爐嘅塑膠食物盒，測試呢啲塑膠食物盒喺加熱之後會唔會釋出塑物劑影響食物安全。
 
7款樣本有塑化劑
消委會發現以下7個樣本含有塑化劑：

1. Tark
2. 新海洋New Ocean
3. Everlock
4. Lock & Lock
5. Jinqing
6. JCJ
7. unix ware

消委會指出平時用呢啲塑膠盒時雖然唔會即時對我哋嘅身體帶嚟啲咩嘅影響，但係有海外研究指出如果長期攝入塑化劑，會對我哋嘅肝臟、腎臟、生殖系統同發育造成影響。所以如果大家要選用食物盒時最好都係唔揀返無乜塑化劑嘅產品！
 
平時要多啲留意膠盒嘅物料 要揀PP整嘅產品
消委會都提醒大家平時要揀有PP，即係以聚丙烯，整嘅膠盒。因為有PP嘅標籤即係佢可以受熱120度，符合微波爐嘅要求。
 

中間三角形內有個「5」字的符號，表示該膠盒以聚丙烯(PP)所製造。
 
但係要留意一樣嘢！就係有時盒蓋同盒身嘅物料係唔同，所以平時最好十弓日中係拎走膠蓋先放入微波爐！

微波爐膠盒小Tips!
世事永遠都無我哋諗得咁美滿，人生難免會有啲缺陷，但至少我哋有方法令用微波爐膠盒時可以安全啲！

1. 第一次用盒嘅時候最好用洗潔精徹底洗乾淨，但記得唔好用百潔布，費事刮花膠盒；
2. 如果盒蓋物料唔係PP嘅物料，加熱前要先拎開個蓋；
3. 如果膠盒顏色由透明變成白或者變黃，或者物料變硬或變形，就應該立即換咗去；
4. 如果要叮熱啲高油分或者高糖分嘅食物，最好用微波爐適用嘅玻璃或者陶瓷器皿；
5. 平時最好打開塑膠食物盒蓋方便水蒸氣排出；
6. 要睇返製造商嘅產品說明，小心使用！ 

如果大家係用塑膠飯盒嘅就記得要睇返以上呢幾點，就咁可以食得安心同健康！

文：阿飛