搵工唔易，尤其係競爭激烈嘅香港職場。根據著名職業網站調查，超過78% HR表示求職信（Cover Letter）係篩選人才時重要參考之一。由撰寫CV、接電話應對、到面試表現，每一步都係學問。但你知唔知，一封求職信就足以令你被淘汰？

唔好以為打幾句客套說話就收貨，以下6個常見錯誤，可能就係你未被錄用嘅原因！

❌ 1. 以「Dear Sir/Madam」開頭
根據LinkedIn職場禮儀報告，有具體稱呼嘅求職信比無名氏開頭嘅回覆率高出35%。如果招聘廣告冇寫聯絡人，可以上公司網站搵資料，或者用「Dear HR Manager」都比「Sir/Madam」好得多。

❌ 2. 無主題或主題太簡單
每日HR平均收到超過50封求職電郵，Subject欄寫「應徵」兩字根本唔夠吸引。正確做法係：清楚列明申請職位＋職位編號，例如「Application for Marketing Executive – Ref: ME2025」。

❌ 3. 附上不專業證件相
有HR反映曾收過自拍照、學生相甚至旅行照！求職信講求誠意與專業，建議使用正裝、整齊髮型、得體妝容嘅證件相，唔好俾第一印象扣分。

❌ 4. 內容刻板、一式一樣
用網上Template Copy & Paste唔止冇誠意，仲可能出錯！有HR分享，每月最少收到10封連公司名都冇改嘅求職信。每份職位都應該針對性撰寫，講清楚你點樣勝任，唔好一稿多投。

❌ 5. 內容太長
有HR曾收過長達15頁嘅CV，結果直接跳過。求職信應該簡而精，一頁內完成，重點介紹背景、強項、聯絡方式，唔好寫成自傳。

❌ 6. 附件過大或順序混亂
Email附件建議總容量唔超過2MB，所有文件以PDF格式儲存。最好將CV、推薦信、學歷證明等整合成一個檔案，避免漏傳或混亂。

有人話睇書檯知人企唔企理，睇手字知人有冇文彩，而我話：睇封Cover Letter就知你做事有冇心！求職信唔係形式，而係你展示態度與能力嘅第一步。連一封信都唔肯認真寫，點說服人請你做事？

文：Noelle＠ECjobsonline 編輯部