捱過無數寒冬與炎夏，終於迎來離職前最後一日。唔少人會選擇將餘下年假扣晒，提早「放長假」唔再返工，等到正式離職日就直接出糧走人。雖然做法合法，但職場上講求人情味與專業態度，最後一日點樣表現，往往會成為你留低嘅印象。

根據本地人力資源顧問分享，不少公司主管都表示，員工最後一星期的表現，會影響佢哋日後願唔願意提供推薦或再度合作。想令同事、上司記住你最好的一面？以下四招幫你優雅收尾，為職場生涯加分！

1. 守至最後一刻：專業收尾，唔留尾巴
最後一日唔代表可以「hea住等收工」，反而係展示你職業操守嘅關鍵時刻。
✅ 建議：準時返工、處理好手頭工作、清理電郵、交代未完成事項，讓人記得你係個有交代、有責任感嘅好同事。

2. 交接清晰：唔好留低「地雷」比人拆
你走咗之後，同事要接手你嘅工作，交接唔清楚只會令大家頭痛。
✅ 建議：預留2–3日作交接期，親身講解比接手同事，唔好單靠email或文件。列出清單，包括：

• 未完成項目進度
• 關鍵聯絡人／文件位置
• 系統登入／操作流程
• 預計完成時間及負責人

咁做唔止幫到同事，仲可以令你離開時更有風度。

3. 慰勞同事：感謝同行，留住人情味
Last Day唔少得嘅散水餅、午餐聚會，其實唔止係儀式感，更係你向同事表達感謝嘅機會。
✅ 建議：親口講一句「多謝你哋一直支持」，比一盒心意餅、一張手寫卡，遠比社交平台留言更有誠意。
記住：「職場好細」，你唔知邊日會再同佢哋共事，留個好印象，日後見面都會開心啲。

4. 答謝上司：感謝栽培，保持聯絡
不論上司係嚴格定友善，都值得你講句「多謝」。你可以簡單講：「多謝你一直俾機會我學習，未來希望仲有機會合作。」
✅ 建議：如果關係不錯，可以加LinkedIn或保持聯絡，佢哋可能係你下一份工嘅推薦人，甚至介紹新機會俾你。

延伸貼士：

• 離職前一星期可主動約上司傾一次，講清楚交接進度
• 清理個人文件、電腦資料，避免遺留敏感資訊
• 若公司有Farewell Policy，可主動配合安排，展示尊重

離職唔止係一個結束，更係你職場形象嘅延伸。做好交接、表達感謝、保持專業，唔單止令你「好走」，仲可能為你打開下一道門。
記住：你最後一日嘅表現，可能就係大家對你最深刻嘅印象。

文：Jamie＠ECjobsonline 編輯部