一份工作做得耐，新鮮感消失，衝勁漸漸減退，你可能開始懷疑：呢份工真係啱自己嗎？綜合網友同專家意見，以下5個徵兆值得你留意，睇睇自己係咪入錯行，甚至應該考慮轉工。

1. 工作變得毫無意義
每日忙到飛起，但心裡卻毫無投入感，只係為咗完成一個又一個項目，等鐘聲一響就急不及待收工。當你覺得努力只係徒勞無功，可能就係時候重新審視自己嘅職業方向。

2. 上班恐懼症
挑戰性項目會令人緊張係正常，但如果你一諗起返工就心慌、甚至肚痛，星期一朝早成為惡夢，咁就唔單止係壓力，而係警號——你可能真係唔適合繼續留低。

3. 完全唔喜歡現時工作
當你覺得所長無法發揮，工作中找唔到半點樂趣，甚至渴望有更充實嘅學習機會，呢份工已經無法令你成長。繼續留低只會浪費時間，離開可能係更好選擇。

4. 永遠追唔上同事
挑戰可以推動成長，但如果你已經拼盡全力，仍然追唔上同事表現，經理要求永遠達唔到，問題未必係你能力不足，而係工作環境根本唔適合你。

5. 談起工作只剩負能量
當家人朋友問起工作，你只係勉強點頭，或者滿肚子怨言。當工作只帶來負面情緒，無法令你感到自豪或快樂，呢就係最明顯嘅信號：係時候作出改變。

工作唔單止係搵食，更係人生重要一部分。如果以上徵兆你中咗幾項，可能真係入錯行。勇敢轉工，未必係失敗，而係為自己尋找更合適嘅舞台。

文：Jamie＠ECjobsonline 編輯部