履歷表（CV）係僱主對你的第一印象，一份專業、清晰的履歷表能大大提升面試機會。相反，如果履歷表寫得草率、錯漏百出，就算你本身能力再好，僱主都可能直接將你剔除。以下整理出 8 大常見錯誤，並加上延伸解釋，幫助你避免「自我淘汰」。

1. 低級文法錯誤
打CV都可以串錯字，就真係唔好怪人地唔請你。Curriculum Vitae、availability、qualifications、proficiency等字唔肯定點串就記得查定字典喇！出嚟做野連surname嗰行都可以填咗自己個名嘅話，就真係要好好檢討一下自己喇！無謂笑大人個口啊！

提醒：履歷表係正式文件，錯誤代表你缺乏專業態度。建議完成後至少檢查三次，或請朋友幫忙校對。

2. 格式標新立異
求職時多突出自己固然係好的表現，但你份CV花哩花碌、加曬背景、顏色字、highlight和emoji，仲較到個font size去到10或者45，我諗僱主連份CV都唔洗睇就可以foul走你。

提醒：履歷表應以簡潔為主，字體建議使用 Arial 或 Calibri，大小保持在 10–12。排版清晰比花巧設計更重要。

3. 電郵地址過於新穎獨特
大家細個開email account都鐘意改啲好卡哇依的username : piggykitty12974dfsa@iloveu.com ; jojoqq$%520@partynight.com。冇錯！小學雞玩下send email就可以，但唔該唔好叫僱主send email去一個咁嘅account！我諗嚇到佢心臟病都似！

提醒：最好使用包含自己名字的專業電郵，例如「firstname.lastname@gmail.com」

4. 濫用句子
個個人都唔鐘意聽啲陳腔濫調的說話，但又偏偏鐘意喺CV撻曬啲聽到都覺得忟嘅通俗語句出嚟 : 我的長處係好肯學野、擅於溝通、有團隊精神、積極上進、擅於解難bla bla bla，計我話，優點呢家野唔係話你寫出嚟就實係嘅！

提醒：與其寫空洞詞語，不如舉例說明，例如：「曾協助團隊完成 3 個大型專案，並改善內部流程」。

5. 撰寫個人嗜好
請各位謹記，寫CV唔同寫入學信，你平時鐘意睇書、唱K、打波、打機定睇電視，同僱主請唔請你一啲關係都冇！所以你寫你平時幾鐘意吟詩作對、幾勤力去做義工，僱主都係唔會對你特別加分架！

提醒：嗜好只在與職位相關時才有用，例如申請設計師可提及「攝影」或「繪畫」。

6. 撰寫與申請職位無關的成就或獎項
同樣，寫CV唔係話撻得最多野嗰個就一定請硬。你明明係apply保險行業嘅，就唔好寫你中學拎過朗誦比賽優異獎 ; 你申請做英文老師，就唔需要同人講你好叻打program ; apply銀行工，就更加唔洗話你年年都去參加渡海泳！

提醒：履歷表應聚焦於與職位相關的成就，例如專業資格、比賽獎項、行業認證。

7. 撰寫與申請職位無關的工作經驗
雖然人人都話工作經驗越多越好，但寫CV時，都應該要根據所申請的職位，去衡量番邊啲工作經驗寫，邊啲唔需要寫落去，特別係apply一啲專業行業時，就更加無需特別指明你番過餐廳侍應或者時裝店的part-time。

提醒：只需挑選能展示 transferable skills 的經驗，例如「餐飲業工作中學會處理客戶投訴」。

8. 過於簡短或沉氣
有人怕長氣又唔知點寫CV，於是就求奇hea做自我介紹、略提自己做過咩工，學歷、聯絡方法都唔寫就收尾 ; 有人就怕蝕底，咩都寫曬落份CV度，最後send咗份長達4頁紙的CV比僱主。寫CV要做到簡而精的確不容易，不過如果連最基本的自我介紹、學歷簡介和工作經驗等都寫唔好，就唔好怪人唔比機會你喇！

提醒：履歷表最佳長度為 1–2 頁，內容要簡而精，突出重點。

額外建議

• 量化成果：用數字展示成就，例如「銷售額提升 20%」、「縮短流程時間 30%」。
• 針對職位調整：不同職位應有不同版本的履歷表，避免「一份 CV 打天下」。
• 保持更新：履歷表應定期更新，避免面試時才臨急抱佛腳。

履歷表雖然只是一份文件，但字裡行間的語氣、資料的篩選，足以反映一個人的用心。僱主往往透過履歷表決定是否給予面試機會，所以切勿偷懶。做到 簡而精、專業清晰、突出重點，才是成功的第一步。

文：Noelle＠ECjobsonline 編輯部