好多打工仔以為要「落足鞋油」或者「扮Leader」先可以搏上位，但事實係，如果你本身嘅資歷、態度同能力唔討老闆歡心，做幾多野都冇用。與其浪費時間，不如了解下老闆真正欣賞嘅員工特質，對症下藥更有效。
 
1. 名校畢業生
雖然人品最重要，但現實係，名校背景往往更容易加分。調查顯示，超過 60% 香港僱主在招聘時會優先考慮名校畢業生，因為代表智力、能力及「面子」。

2. 本科生
請人時，大部份老闆都會要求求職者具相關行業的學位資格，例如見銀行工就要係business、finance等學科的畢業生。讀文學嘅走去見保險業，冇相關知識，人地唔想從頭教你，就梗係唔願請你啦！所以大學時讀邊科對將來真係好重要架！不過係咪繼續讀上去，拎埋個master，甚至博士學位就一定有着數啲呢？咁又唔一定，大部份工種，普通一個大學畢業生的資歷已經足夠應付有餘，讀得太多書，老闆可能覺得請你係一種大材小用，反而唔請你添啊！

3. 轉工次數少的人
忠誠度係老闆最重視嘅特質之一。根據 Indeed 調查，穩定性高的員工更容易獲得升職機會。相反，經常跳槽會被視為缺乏歸屬感。

4. 有主見的員工
老闆唔一定要自己話曬事嘅，有時候，員工的意見更重要、更有創意。因此，唔少老闆都欣賞有主見的員工，除左可以推動公司發展，更能夠帶領一班員工前進，幫輕老闆的工作量。乜老闆唔擔心員工太有主見會搶走自己風頭咩？當然唔會啦！試諗下，老闆會鐘意六神無主、咩都盲目服從的員工，定係有主見、勇於表達自己的員工多啲呢？答案呼之欲出啦！

5. 社交圈子廣泛的員工
社交平台多friend子就一定係唔好？咁你就錯喇！老闆就係鐘意多friend的員工，事關社交圈子越廣泛，一切有關公司的傳播和覆蓋率就越大，員工就間接成為左公司與外界的溝通橋樑。有一個活生生的招牌，代公司向其他人賣廣告，老闆多謝你都嚟唔切啦！

6. 有話直說的員工
老闆高高在上，一唔小心講錯野，分分鐘收warning letter，甚至比人炒左都唔知咩事。其實老闆係咪就一定討厭員工講負面嘅說話呢？咁又唔一定啵！有嗰句講嗰句，先顯得你份人客觀、坦誠、唔虛偽。所以，以後有咩想表達，不妨照直同老闆講，唔需要用咩語言偽術去包裝句子，老闆自然會知道你係一個直率、不造作的員工。

📊 數據總結

• 70%+ 招聘廣告要求相關學位
• 60% 僱主偏好名校背景
• 忠誠度高員工更易升職
• 主動積極、溝通能力強 = 老闆最愛的特質

職場如戰場，老闆最欣賞的員工並非「擦鞋王」，而係 有能力、有態度、有忠誠度。其實，老闆請你返嚟，就係因為你嘅特質。只要努力工作，展現真正價值，你都可以成為出色員工。

文：Noelle＠ECjobsonline 編輯部