搵工唔易，由搵職位、做功課、填表、見工到錄取，唔知用咗幾多時間、幾多心機。有時連interview都未有就被reject，仲要重新再嚟過。但其實冇公司請你，唔一定係學歷唔夠、經驗不足，可能只係你喺面試時犯咗啲無意間扣分嘅壞習慣。即刻睇下你有冇中招！

1. 遲到／太早到
準時係基本禮貌，遲到只會令人覺得你冇準備、冇誠意。至於早到一個鐘，其實都唔係好事，可能會打亂對方安排。最佳到達時間係早15至20分鐘，可以冷靜下、觀察環境、準備心情。

2. 空肚見工
早餐係一日最重要一餐，唔食會影響專注力、精神狀態。面試前食啲簡單嘅嘢補充糖分，唔好比自己恰眼訓、腦袋唔清醒。

3. 冇做功課
唔了解公司背景、業務、文化，就算你有幾多學歷都冇用。面試前做足research，答問題先有料到，亦能展示你嘅誠意。

4. 等面試玩手機
等候期間唔係捉精靈、刷IG時間，應該複習筆記、準備心情，令自己入場時即刻ready。

5. 攞太多嘢入場
見工唔係搬屋，簡潔整齊最重要。電話、銀包、面試資料＋一枝水就夠，女士可帶化妝袋備用，唔使左手咖啡右手公事包咁論盡。

6. 小動作太多
抖腳、咬手指、眼神游離等都會令人覺得你緊張、唔穩陣。建議喺屋企對住鏡練習，觀察自己有冇壞習慣，面試時自然大方先加分。

7. 講前公司壞話
就算你真係被前公司整蠱，都唔好喺面試時數佢不是。正面回答「想轉環境／尋求新挑戰」會更得體，亦顯示你成熟、有計劃。

8. 插嘴搶答
太進取反而扣分，唔尊重其他人發言＝唔識合作、冇耐性。面試係交流唔係辯論，識聽先係加分位。

CV靚、經驗多都唔代表穩袋offer，面試表現先係關鍵。以上8個壞習慣，你中咗幾多個？即刻改掉，唔好喺非能力範疇失分！

文：Noelle＠ECjobsonline 編輯部