夏天返工開冷氣係人之常情，但長期處於冷氣環境下，容易出現頭痛、四肢無力、咳嗽、皮膚乾燥等「冷氣病」症狀。根據香港中西醫資料，冷氣病並非急性疾病，但會影響免疫力、工作效率及生活品質。想涼得舒服又唔易病？以下6招幫你輕鬆應對！

1. 冷氣溫度唔好太低
冷氣開得太凍會刺激鼻腔、氣管等呼吸系統，導致鼻水、咳嗽、肌肉繃緊等問題。中醫認為寒邪入侵會耗損陽氣，影響身體運作。
✅ 建議冷氣溫度設定於25°C至26°C，避免低溫刺激。

2. 避免室內外溫差過大
香港夏季室外氣溫常超過30°C，而辦公室冷氣常設於20°C至24°C，溫差高達10°C以上。血管急縮、肌肉緊繃，容易引發頭痛、疲倦、消化不良。
✅ 冷氣溫度只需比室外低2–4°C，已經足夠降溫。

3. 保暖裝備要齊全
中央冷氣無法個別調節，容易出現肩頸僵硬、手腳冰冷。中醫建議寒底人士可飲薑茶驅寒，促進血液循環。
✅ OL們記得帶外套、披肩、頸巾，坐得耐要郁下手腳，改善循環。

4. 頭頸保暖減少頭痛
冷風直吹頭頸係頭痛元兇之一。濕頭髮遇冷氣更易頭痛，甚至引發失眠。
✅ 用頸巾包住頸部、抹乾頭髮、放工敷熱毛巾或按摩風池穴，有助舒緩不適。

5. 對抗乾燥環境
冷氣會抽走空氣濕氣，令室內濕度下降，導致眼乾、皮膚痕癢、喉嚨乾癢等症狀。
✅ 枱頭放杯水、定時眨眼望遠、搽潤膚霜，都有助保濕抗乾。

6. 消暑唔一定靠冷氣
長時間開冷氣不但令身體不適，亦會增加電費及碳排放。根據資料，冷氣調高1°C可節省約6%電費。
✅ 可用迷你風扇、短時間冷氣＋風扇對流，飲冬瓜、薏仁、洛神花等天然清熱湯水，養生又環保。

冷氣開得啱，身體先舒服。由調節溫度、改善濕度到飲食保健，簡單幾招就可以減少「冷氣病」風險，仲可以慳電、做環保，一舉多得！

文：Noelle＠ECjobsonline 編輯部