香港春夏季濕度高企，根據天文台數據，每年三月至五月平均相對濕度高達82%，加上打工仔長期坐辦公室、食無定時、缺乏運動，濕氣積聚問題愈來愈普遍。中醫認為「濕為陰邪，黏滯重濁」，都市人十個有九個體內有濕邪潛伏。濕氣未必即時發病，但會慢慢影響脾胃功能，導致疲倦、痰多、水腫、免疫力下降，甚至引發濕疹、脂肪肝、高血壓等慢性病。

你以為訓唔夠，其實係濕氣搞鬼。以下8個方法，幫你改善生活習慣、祛濕健脾，重拾精神狀態：

1. 冷氣唔好開太凍
冷氣屬「外寒」，長期吹冷風會令血氣凝滯、脾胃受損。建議冷氣溫度調低外界氣溫2至3度即可，或改用風扇加開窗，減少濕氣積聚。

2. 每日適量運動
出汗係最直接祛濕方法。根據世界衛生組織建議，成年人每星期應進行至少150分鐘中等強度運動，有助促進新陳代謝、排走濕氣。

3. 飲食戒口＋定時定量
炸物、甜品、凍飲、生冷食物、辣野、酒精都會傷脾胃。中醫認為脾主運化，脾虛則濕生。建議食清淡、定時定量、細嚼慢嚥，減少濕毒積聚。

4. 食療祛濕
綠豆赤小豆湯、薏米粥、紅豆、蓮子、茯苓等都有健脾利濕功效。薏米被譽為「天然祛濕王」，有助改善水腫、濕疹、暗黃膚色。

5. 穴位按摩
承山穴（小腿後側）可祛濕、紓緩疲勞；極泉穴（腋下）可清心火、改善心悸。每日按揉兩次，有助疏通經絡、調理氣血。

6. 避免潮濕環境
春夏多雨，避免淋雨、涉水、訓地板。地板濕氣重，易引起四肢痠痛。保持居家乾爽通風，有助減少濕氣入侵。

7. 衣物要乾爽
潮濕天氣下，濕衫未乾唔好著上身。出汗或淋雨後要即時換衫，避免濕氣黏身。保持衣物乾爽，有助減低皮膚病風險。

8. 留意身體警號
每日起身攰、頭重、訓極唔夠、舌苔厚白、大便黏馬桶、排唔清，都是濕氣重的徵狀。中醫認為「濕困脾胃，百病由生」，唔好再忽視。

濕氣唔止影響精神狀態，長期積聚更會損害免疫力、引發慢性病。打工仔要由生活習慣入手，改善飲食、增加運動、遠離濕環境，濕氣自然無位企。

文：Noelle＠ECjobsonline 編輯部