夏天熱到出晒汗，空氣又焗又多塵，搞到塊面油光滿面，一唔小心就爆痘！再加上香港濕氣重，護膚品又厚又黏，暗瘡一出就成個星期唔散，真係煩到爆！其實想改善膚質，唔一定要靠貴價護膚品，識食啱食材，由內調理先係長遠之計！以下5款天然食療，幫你清熱解毒、去痘養顏，簡單易整又平靚正：
 
1. 薏米海帶湯
薏米有改善皮膚的作用 ; 而海帶就無論係洗淨後冰敷，定係飲用都有消除暗瘡的果效。連同合桃、杏仁和杞子等一齊煲湯或者煲粥食，都能夠有效清熱解毒、活血化瘀、養顏和預防暗瘡。
 
2. 山楂綠豆湯
山楂可以幫助促進血液循環 ; 而綠豆呢啲豆類食品就可以抗感染和清熱解毒，兩者一齊煲湯飲仲有消暑的功效，啱曬夏天當飲品飲啊！
 
3. 西芹蕃茄青菜汁
西芹同樣能有助促進血液循環 ; 而蕃茄和青菜類則可降低皮膚裡面的油脂成份。榨汁後飲用有清熱解毒、下火、預防暗瘡和養顔爽膚的功效。大家仲可以加入唔同的蔬果轉換一下口味添！唔同蔬果對人體有唔同的好處和功效架！
 
4. 紅豆百合薏米水
頭先都有提到，薏米能有助改善皮膚質素，可以幫助祛斑、祛暗瘡和消除粉刺，令你的皮膚有番曬光澤 ; 而紅豆就有利尿、排毒、祛水腫和清熱解毒的作用 ; 百合都唔差！同樣有清熱、促進新陳代謝和美顏的果效。煲埋一齊飲簡直就好似食緊紅豆沙一樣咁滋補，大家仲可以依個人口味加啲蜜糖落去吊下味添！
 
5. 黑木耳紅棗湯
黑木耳有促進血液循環、健脾益腎和排毒美顏的作用，加埋紅棗一齊煲湯飲仲可以祛斑、保持肌膚濕潤滑膩和防止皮膚老化！真係女士們的一大補品！唔係生暗瘡都要飲番幾碗至得！不過出血患者、遺患腹瀉期間和孕婦就唔好食黑木耳喇！而且記住黑木耳並不能與蘿蔔和螺肉等一起食用。
 
護膚美顏是女士們一生的使命，而貪靚亦都係人天生的本能之一，但要維持一個靚樣，唔應該只倚賴護膚品呢啲非天然的化學物質。其實我地身邊就已經有好多純天然、價錢仲一啲都唔貴的養顏食品，調理好身體脾胃功能，皮膚先會由內靚到外架嘛！

文：Noelle So＠ECjobsonline 編輯部