眨下眼又到咗大家最期待嘅聖誕節！平安夜玩通宵、除夕倒數、食大餐、睇燈飾，全部都係必備節目。但講到最刺激、最令人期待嘅環節，點少得交換禮物？不過，交換禮物本來係一件開心事，偏偏有人買禮物「hea到爆」，令收禮人心情即刻由聖誕快樂變成「聖誕失望」。以下呢個 十大最hea最唔想收到嘅聖誕禮物清單，睇下有冇正中你心聲，或者…正正就係你買嗰份？

1. 相架
今時今日仲有幾多人會曬相？收到相架真係唔知好嬲定好笑，仲要係膠膠地嗰啲，完全冇用。除非你送埋部老爺菲林機一套，否則真係「收唔落手」。

2. 水杯
水杯長期霸榜十大最唔想收禮物Top 3。屋企已經多到爆，仲要好多係抽獎送嘅「花紋公仔杯」。除非係聖誕限定款，否則真係唔好再送啦！

3. 無聊擺設
香港居住環境愈嚟愈細，擺設又冇用又佔位，仲要容易變垃圾。送擺設嘅人，係咪覺得人哋屋企太空曠？拜託，買禮物前請三思。

4. 月曆
年尾快餐店、商舖、屋苑辦事處都會派月曆，屋企隨時有十幾個。大家早就用手機 Calendar，月曆真係「多到唔想收」。

5. 鐘
雖然後生仔唔再迷信「送鐘＝送終」，但一拆禮物見到個鐘都幾無奈。屋企通常已經有一個鐘，唔缺之餘仲冇需要再多一個。送鐘係咪想提醒大家「珍惜時間」？

6. 公仔
除非係正版、靚款，否則大大隻又甩毛嘅公仔真係唔想收。男仔抽到仲更加尷尬，放屋企又唔知點處理。

7. 護膚品套裝
聖誕優惠最常見嘅「大方得體」選擇，但問題係每個人皮膚唔同，送錯仲可能引致過敏。屋企仲有2013年嗰盒未開封，唔好再送多 set 啦！

8. 毛巾
迪士尼手巾、浴巾 set 聽落好吸引，但屋企唔係冇毛巾用。收多幾條只會變「地布候選人」。

9. 文具套裝
雖然文青鍾意寫字，但筆、擦膠其實唔需要多。50蚊一 set 文具，送咗只會變「無用存貨」。

10. 食用／日用品
最「hea」嘅選擇：朱古力禮盒、牙膏 set、洗髮水、紙巾…真係好似買餸順便買埋。雖然實用，但完全冇驚喜，收禮人只會心諗：「咁不如直接派現金啦！」

交換聖誕禮物本來係一件開心事，但如果收禮人完全感受唔到快樂，你份禮物就真係 fail 咗。將心比心，你唔想收水杯或者毛巾，就唔好「hea住揀」嚟遺禍人間。祝大家聖誕快樂，願你哋今年抽到嘅禮物都係合心水！Merry Christmas & Happy Gift Exchange!

文：Noelle＠ECjobsonline 編輯部