社會成日講「人人平等」，強調權利同待遇應該一視同仁。但現實係：有人的地方就有競爭、有是非、有偏見，職場更加係重災區。無論你學歷幾高、經驗幾多、能力幾強，都難以完全避開歧視問題。

1. 性別歧視
雖然女性地位逐漸提升，唔少女高層都證明咗自己能力絕不遜色，但偏見依然存在。性騷擾個案層出不窮，懷孕女同事請假仲會被嫌麻煩。所謂「進步社會」，其實仲充斥住性別不公，幾諷刺。

2. 年齡歧視
後生仔被睇小，覺得未夠成熟；年紀大嘅又被嫌老、跟唔上潮流。其實經驗係寶貴資產，後生人亦值得畀機會。職場若能互相扶持，先至有可能青出於藍。

3. 容貌歧視
口講重視內在美，但「外貌協會」依然主導。面試時，靚仔靚女往往更受青睞，工作待遇亦較順利。問題係：外貌係天生，難道「唔靚」就等於冇價值？

4. 地區歧視
住得遠都成為原罪。每日由天水圍返工到港島，打風落雨遲咗少少就要受責備；想早走仲會被黑面。其實住得遠唔係選擇，員工已經付出更多心力，為何仲要被苛責？

5. 種族、性傾向、更生人士、殘疾歧視
黑人、南亞裔、菲籍人士；同性戀、雙性戀、跨性別人士；有案底或殘疾人士——好多僱主仍然心存顧慮。但招聘應該以工作能力為首要，而唔係種族、性傾向或身體狀況。完美人唔存在，能力先係最重要。

社會愈嚟愈開放，但歧視仲係無處不在。要真正做到「人人平等」，唔係靠口號，而係要學識接受差異、欣賞他人優點。當職場少啲標籤、多啲包容，世界先會更美好。

文：Noelle＠ECjobsonline 編輯部