香港生活指數高出哂名，唔係講笑，外國都有報告證明。對於「餐餐清」嘅打工仔，食咩、買咩都要計過度過，一唔小心洗大咗就大鑊。其實要慳錢，唔一定要靠大動作，從細微地方入手，一樣可以幫到手。教你以下4方面點做個醒目慳家打工仔。

交通：精打細算搭車
交通費係最大開支之一，特別係要過海返工。每程車費超過$10.6，就可以考慮買$425嘅都會票，搭足四十程車。仲有「港鐵特惠站」機，每次拍卡即減$2。
想再慳啲？就要肯行多幾步。好似九龍塘去尖沙咀收費$6.7，但由樂富去就要$8.2。行多二十分鐘，慳到就係你嘅。

飲食：帶飯最抵食
午餐係最大洗費之一。十年前一個餐二十幾蚊，依家要四五十蚊，真係肉赤。最慳錢方法就係帶飯：健康、無味精、成本低。今日肉餅菜心，聽日冬瓜蝦米炒粉絲，成本唔洗$20，抵過茶餐廳。
唔想帶飯？就搵平靚正午市套餐，或者同小店老闆熟絡啲，話唔定有優惠。

消遣：免費活動最爽
返工壓力大，放假要放鬆。但放鬆唔一定要洗錢。跑步、行山、去海灘，親親大自然，免費又健康。唱K睇戲？可以買碟返屋企，一班friend share，無限時咁玩，仲抵玩過去商場。

購物：網購優惠多
網購愈來愈方便，HKTVMALL、淘寶、併多多、GMarket都有新會員優惠，甚至可以開多幾個帳戶。實體購物就等 big sale，平到先買。有人甚至著完衫未過退貨期就退返，但咁做就要自己衡量啦。

所謂積少成多，日日慳少少，最後都可以慳到一餐飯錢，甚至夠去旅行。打工仔生活辛苦，但識慳識用，就可以過得輕鬆啲。

文：小C＠ECjobsonline 編輯部