人愈大，理應愈成熟，但唔知點解，依家少少事都會搞到自己好忟、好唔開心。畀老細鬧幾句就想喊，遇到挫折就好似世界末日咁。係咪我EQ太低？其實未必。心理學家指出，呢啲反應唔係你唔夠堅強，而係你嘅「心理韌性」未發展成熟——即係面對壓力、批評、失敗時，你未學識點樣調節情緒、重整心態。

心理韌性（Resilience）唔係天生，而係可以透過訓練慢慢建立。以下五個方法，幫你一步步鍛鍊出更強大嘅內心：

1.情緒管理：唔畀情緒控制你
心理諮商師 Linda Graham 提出，情緒管理係心理韌性嘅核心支柱之一。當你識得辨識情緒、接納情緒，而唔係壓抑或爆煲，就可以慢慢建立穩定嘅內在力量。你可以試下每日花5分鐘觀察自己嘅情緒反應，唔急住解決，先學識「感受」，再學識「處理」。

小練習：當你感到焦慮或忟憎時，將手放喺心口，深呼吸三次，回想一個令你感到安心或被愛嘅時刻，幫助自己穩定情緒。

2. 每日反思：失敗唔係句號，而係起點
根據教育局《情緒管理與抗逆力》教材，反思係提升心理韌性嘅重要步驟。每日問自己三個問題：

• 今日有咩地方做得唔夠好？
• 有冇犯咗啲可以避免嘅錯？
• 下次可以點樣做得更好？

唔好怕面對自己，因為真正成長就係由「自省」開始。

3. 認清自己強弱點：唔完美唔代表冇價值
心理學家張恩誠指出，心理韌性唔係「唔會跌倒」，而係「跌倒咗都識得爬起身」。你唔叻數，但你英文好；你唔識marketing，但你創意爆棚。唔好因為一個弱點就否定晒自己，反而要識得欣賞自己嘅優勢。

小練習：寫低你曾經收過嘅讚賞、獎項、成功經驗，整成一張「欣賞清單」，喺低落時攞出嚟睇，提醒自己其實你好有料。

4. 設定目標：由細步開始，慢慢進步
心理韌性唔係一日建立，而係靠持續練習。每次失敗後，唔好只係自責，而係要為自己設定一個「改善目標」。例如：

• 今次present太緊張 → 下次練習多啲，講慢啲
• 同客戶冇交流 → 下次主動傾偈，建立關係

每一個小目標都係你成長嘅踏腳石。

5. 突破自我界限：勇敢走出Comfort Zone
根據運動員心理韌性研究，真正堅強嘅人唔係唔怕困難，而係敢於挑戰未知。你怕孤獨？試下一個人去旅行。你怕社交？試下參加gathering。你會發現，原來你可以比自己想像中更堅強、更有彈性。

小練習：每月做一件你「唔習慣但想試」嘅事，例如公開講話、參加陌生人聚會、報讀新課程，慢慢擴闊你嘅心理界限。

心理韌性唔係唔會跌倒，而係跌倒咗都會爬返起身
正如西點軍校研究指出，能夠堅持到底嘅人，唔一定最聰明，但一定係最有「熱情」同「毅力」。你唔需要完美，只要有勇氣面對自己、面對世界，就已經係心理強者。希望你睇完呢篇文之後，可以開始鍛鍊自己嘅心理韌性，唔再畀情緒牽住走，而係真正掌握自己嘅人生節奏。

文：Noelle＠ECjobsonline 編輯部