職場上每日都充滿挑戰，唔止要應付工作壓力，仲要面對各種突如其來嘅「尷尬位」。有啲情境真係一秒令人心慌，唔知點樣反應好。其實好多時只要冷靜處理，加少少幽默感，就可以輕鬆過關。

1. 唔記得同事名：笑容＋補救策略
「Hi! My name is Karen. Nice to meet you!」、「我叫Jason。」、「叫我Mandy得喇。」……個個同事都用英文名稱呼，有啲重覆性高，屬於「大路名」；有啲就第一次聽；有啲就……有時呢頭講完，嗰頭已經忘記咗，總之就記唔入腦。雖然介紹過唔記得唔係咁好，但如果係只見過一次，之後唔記得，禮貌咁問返人叫咩名其實唔會有問題。但假如之後又唔記得，仲要兜口兜面撞正要打招呼，咁就以微笑搭救，同佢打聲招呼，之後再問下相熟同事佢個名，然後記實就得喇。倘若開會時要點名討論，加返手勢或者以「同事」稱呼，都可以過關。不過最好就當然係記實人哋個名啦！

2. 被撞破講是非：冷靜＋道歉
好似電視劇咁，真係有人選擇喺廁所或者茶水間呢啲以為冇人嘅公眾地方講人是非，但又咁啱俾其他同事撞破，應該點算好？其實對方係咪真係知道你講梗其他人是非都係一個問題，所以千萬唔好自亂陣腳。到時人哋本來唔知，都變咗知道你原來講人壞話。萬一對方真係聽到你講是非咁就應該私底下同佢講返事件中自己有唔恰當嘅地方，睇下對方願唔願意原諒或者當冇事發生。如果對方唔係內容主角，而本身同你無仇無怨，問題通常好快解決。而當對方係內容主角，除咗道歉，盡量避免之後同佢有所接觸，否則會越來越尷尬。

3. 叮錯飯盒：誠實＋小 memo
做咗半日嘢終於放lunch，仲唔即刻叮返個住家飯盒醫肚。咪住！唔小心叮錯人哋個飯盒，但又唔知係邊個嘅，點算好？即刻放入雪櫃就一定會焗臭啲飯，攤凍啲再放入雪櫃扮冇事咁樣又係咪正人君子嘅做法？其實寫返張memo，同人say返sorry，講返幾點錯手叮咗人哋個飯，相信對方都唔會太擺上心。下次睇清楚個飯盒先好放入微波爐喇。

4. 同人撞衫
十個上班族有七個都會上某網購平台買衫，而返到工又著得出街嘅來來去去都係嗰啲款式，撞到正一正真係唔出其。你話同相熟嘅同事撞衫可能冇咩所謂，但如果係唔熟，甚至係關係唔係太好嘅同事或者上司，咁就真係唔知點喇。或者其實人哋都唔係好在意，你咪當冇事發生，做返正常嘅自己，唔需要因為同人撞衫而方寸大亂。
 
5.去廁所冇廁紙：勇敢＋求助
無論小號定大號，去廁所冇廁紙真係一件悲哀嘅事。有網友曾經就呢個話題喺某討論區發起帖文，當中唔少網民都回應話會徒手解決。如果有帶開手機如廁嘅朋友就話可以message同事幫手；但如果廁所訊號唔好，或者空手去廁所嘅，就真係要等有人入嚟，再請佢哋幫手遞紙喇。
 
職場尷尬事人人都會遇到，關鍵係你點樣反應。冷靜、誠實、自然，往往就能化解尷尬。打工仔只要保持幽默感同專業態度，就算遇到「尷尬位」，都可以輕鬆過關。

文：小C＠ECjobsonline 編輯部