有邊個打工仔唔想喺愉快環境工作、唔想職場路上暢順無阻？要做到呢一點，唔止靠努力，仲要靠「口才」。正所謂「野唔可以亂食，說話唔可以亂講」，一個不小心失言，就可能令上司覺得你能力不足、唔成熟，甚至失去信任。

1.「這不是我的錯！」
推卸責任就好似打波時將球踢去人哋腳下，自己企喺度望。成年人要懂得承擔，提出解決方案，先會令上司覺得你係可靠隊友。

2.「這不是我的工作！」
職場唔係打卡遊戲，Job Description 唔係防火牆。上司交代嘅事就係你嘅責任，拒絕只會顯得你冇團隊精神。

3.「當中一定有些誤解！」
溝通唔清楚，就好似 WhatsApp 打錯字，結果令客戶「已讀不回」。上司最怕因為表達問題而失去生意，所以語言藝術就係：講得清楚、聽得明白。

4.「我無法忍受那個同事！」
職場唔係幼稚園，上司唔會想做「調解老師」。成熟嘅員工要懂得互相尊重，用成人方式解決問題。

5.「我病了！無法上班。」
真病冇問題，但假病就好似演技太差嘅舞台劇，一眼就穿。社交媒體同同事口疏都會令你「穿崩」，誠信一旦失去，後果難以挽回。

6. 說話過多或過少
同上司溝通要有分寸。重要資訊要即時匯報，但唔好因為雞毛蒜皮嘅事煩擾佢一整天。語言藝術就係：講得其時、講得其所。

7. 發牢騷和抱怨
公司有難時，大家都坐喺同一條船。你不停抱怨，就好似船入水時仲嫌天氣熱，結果只會令上司覺得煩厭。

8.「我需要加薪。」
加薪唔係單方面要求，而係雙向討論。語言藝術就係：用事實同數據去支持自己嘅貢獻，令上司覺得「加薪係合理投資」。

9.「我會辭職，假若…」
以辭職作威脅就好似打機時亂出「超必」，一旦上司接受，你就輸晒。除非真係準備好離職，否則只會失去尊重，仲可能成為同事笑柄。

職場上「禍從口出」絕對唔係笑話。語言藝術就係懂得用字遣詞，避免失言，令上司對你留下好印象。打工仔要記住：說話係一門藝術，講得好可以加分，講得差就會扣分。

文：Jamie＠ECjobsonline 編輯部