「一星期只返四日工」一直係香港打工仔心中嘅理想生活模式，但現實係，呢個夢想喺香港似乎遙不可及。不過，外國已經有非牟利組織「4 Day Week Global」聯同多間企業進行咗一項為期半年的實驗，推行「每週放假三日」制度，結果令人驚喜！

收入不跌反升！員工更健康
實驗結果顯示，參與公司不但冇因為工時減少而損失收入，反而比去年同期增長咗38%。呢個結果打破咗傳統觀念——即「工時長＝收入高」。而且，903名參與員工當中，有97%表示希望繼續實行四天工作週，認為有助減輕壓力、改善失眠、疲勞與倦怠感，身心健康明顯提升。

參與公司包括來自美國、愛爾蘭、澳洲及新西蘭共33間企業，大部分都表示唔願意回到傳統五天工作模式。

日本都開始推！Panasonic加入改革行列
除咗歐美地區，日本亦開始響應四天工作週。以工作文化出名「長工時」嘅日本企業Panasonic，亦宣布推行「每週三日假期」，希望員工可以有更多時間追求個人興趣、進修技能，甚至參與義工或兼職工作，達至真正嘅工作與生活平衡。

香港工時全球最長之一
根據香港政府統計處數據，約有12.4%打工仔每週工時超過60小時，而工時中位數為40小時。根據KISI最新報告，香港喺「最佳工作與生活平衡城市」排行榜中排尾六，更喺「全球最過度勞累城市」中高居榜首。

香港有冇可能推行？
雖然四天工作週聽落好吸引，但要成功推行，唔止係「多放一日假」咁簡單。如果工時減少但工作量冇變，員工只會用私人時間補工，反而更辛苦。香港早喺2010年已開始討論標準工時立法，但至今仍未有定案。相比之下，西班牙由政府主導推行四天工作週，成效更明顯。若香港政府唔積極介入，制度難以落實。

6招自救：舒緩工作壓力由你開始
如果制度未改變，不如由自己做起，以下6個方法幫你減壓：

• 寫任務清單：分清優先次序，減少混亂。
• 學識Say No：做唔哂就要講，唔好死撐。
• 同事傾吓：搵人傾訴，互相支持。
• 休息一下：離開座位，吸吓新鮮空氣。
• 保持運動：運動有助釋放內啡肽，提升幸福感。
• 積極社交：約朋友食飯，遠離工作煩惱。

文：Silver＠ECjobsonline 編輯部