喺香港，大部分文職工種例如文員、Office工都係行五天工作週，每星期至少有兩日可以喘口氣，重新整裝迎戰星期一。但其實唔少打工仔都係返緊五天半甚至六天，例如零售、飲食、物管、工程、運輸等行業，放假變得奢侈。

最近有網民開帖討論：「五天工作週錢少 VS 五天半工作週錢多」，引起熱烈迴響，結果竟然一面倒！

八成人寧願少啲錢都要五天工作週！
大多數網民都揀「五天工作週但錢少」，原因好簡單：Work-life Balance比錢更重要。大家都想有私人時間去搵朋友、食飯、玩樂，唔想日日都困喺公司。仲有網民指出，所謂「半日工」根本唔係半日——要早起、搭車、返工、返屋企，一來一回已經霸晒成日，根本唔算真正休息。

部分留言仲話：

• 「返五日都覺得多」
• 「寧願返六放二，好過返五點五放日半」
• 「一星期得七日，比咗五日公司已經好癲」

點解仲有人揀五天半？
雖然大多數人揀五天，但都有約兩成網民支持五天半，認為多返半日就有多啲錢，值得！
有人話：「放假都無嘢做，不如返多半日搵錢」，亦有人分享：

• 「2皮5日 / 3皮5.5日，應該好多人揀後者」
• 「窮人時間唔值錢，有得選擇邊個唔想休息多啲」
• 「我啲朋友唔介意返5.5日，因為下晝可以直接去行街」

你又點睇？你會揀錢定時間？
唔止睇返工日子，工時先係關鍵！根據香港政府統計處數據，香港人平均每週工時係44.1小時，比好多地區都要長。唔少行業雖然話係「五天工作週」，但實際係將六日工時攤分落五日，變相返緊五天半。

香港工時排行榜
最長工時行業：

• 保安服務（60小時）
• 中式酒樓（57小時）
• 港式茶餐廳（55.4小時）
• 非中式酒樓／地產保養（54小時）
• 快餐店（53.4小時）
• 超市／便利店／洗衣店（51.9小時）
• 其他餐飲服務（50.8小時）
• 建造業（48小時）

最短工時行業：

• 進出口／資訊科技／金融／專業技術（40.6小時）
• 教育及公共行政（41.8小時）

文：Silver＠ECjobsonline 編輯部