好多打工仔都話職場險惡，分唔清邊個係真小人，邊個係假君子。尤其係新人，經驗未夠，分分鐘畀人利用咗都唔知。不過，世事總有例外，有啲人真係好彩，喺職場上遇到知心好友，平時唔單止可以約埋行街、食飯，工作上仲互相照顧。俗語有云：「識人好過識字」，要喺職場混得好，有貴人支持絕對少不了。

有共同喜好，話題自然多
朋友要「啱咀型」先會熟落。如果你同同事都鍾意打波、睇戲、追星，呢啲共同喜好就係契機。相處時間多咗，關係自然 close 啲，慢慢就由同事變成朋友。

工作態度一致，最易夾得埋
「近朱者赤，近墨者黑」，如果你同同事都係認真勤奮，目標一致，合作起上嚟就特別順利。相反，如果態度差太遠，真係好難夾。遇到積極嘅同事，最好多多學習，互相提升。

願意幫忙，不斤斤計較
有啲同事幫你一次就要你還人情，甚至扮唔得閒拒絕。但如果遇到一個義不容辭幫你、又唔會計較嘅同事，就要好好珍惜。互相 carry，慢慢就會成為密友。

肩並肩承擔過錯
職場上，出錯時好多同事第一時間明哲保身，留你一個人頂晒。但如果有人願意同你一齊承擔，幫手補救，證明佢唔止當你係同事，而係真心朋友。

耐心教導，三生有幸
遇到有耐性教你嘅同事，真係難得。唔係個個人都肯花額外時間去指導你，呢種同事值得你尊重同感激。

有好嘢會預埋你
好同事唔會獨食，有咩消息、好嘢食、好嘢玩都會記得通知你。開會改時間、老細派下午茶，都會單聲一聲。呢種細心，正正係密友嘅特質。

職場人際關係好講緣份。遇到知心好友固然係好事，但唔需要強求。知心好友唔需要多，一兩個就夠。道不同不相為謀，做唔成朋友，咪做返普通同事。要喺職場搵到密友，真係唔容易，但一旦遇到，就要好好珍惜。

文：Jenny＠ECjobsonline 編輯部