美國矽谷科技巨頭 Google 最近宣布，將調整招聘流程，恢復「至少一次」實體面試環節，原因竟然係——太多求職者喺線上面試用 AI「作弊」！

根據《Mashable》報導，Google CEO Sundar Pichai 喺公司內部會議上表示，喺混合辦公模式下，有求職者利用 AI 工具喺遠端面試中取得不公平優勢，令 HR 難以準確評估人才。他認為，面對面交流可以令候選人更了解 Google 文化，公司亦能更真實掌握對方能力。Google 招募副總裁 Brian Ong 亦坦言，AI 喺面試過程中愈來愈普遍，公司要重新設計評估機制，避免技術干擾招聘結果。

AI入侵招聘界？唔止Google
其實 Google 面對嘅問題並唔係孤例。Meta 早前就話會喺 coding 面試中容許使用 AI 工具，結果即刻惹來外界質疑：咁算唔算默許作弊？而學術界早已面對類似挑戰，唔少學生直接交 ChatGPT 寫嘅功課，令老師頭痛不已。

網民反應：Google成為「自家產品受害者」
消息一出，網民反應熱烈，有人話「諷刺到極點」，一間推動 AI 發展嘅公司，竟然要靠傳統面試防止 AI 作弊。仲有人笑言：「Google先用面對面請人，再用 AI 取代佢哋，最後再炒人。」亦有網民直言 Google 已成為「自己產品嘅受害者」。

AI入職場速度超乎想像
報導指出，AI 已滲透招聘流程各個環節，由履歷撰寫、模擬面試到解答專業測驗，幾乎都可以即時提供協助，令 HR 難以分辨求職者真正能力。