對唔少打工仔嚟講，30歲前去一次工作假期（Working Holiday）係人生清單上嘅重要一項——一邊打工，一邊探索外國生活。但近年唔少新聞報導有人喺海外工作期間遇險，令唔少人開始關注「工作假期保險」嘅保障範圍。

消委會早前就收到多宗相關投訴，指出部分保險計劃未能符合當地簽證要求，甚至令申請被拒。以下小編就整理咗最新資訊，幫你揀啱保險，可以放心出發！

1. 保單必須符合當地簽證要求
唔少國家（例如韓國、德國、澳洲）對工作假期簽證有明確保險要求，包括醫療運送、住院保障等。消委會曾接獲個案，事主因所購保險未涵蓋「緊急醫療運送」，結果簽證申請被拒。

📌小貼士：出發前一定要查清楚目的地政府對保險嘅要求，唔好只聽保險代理講，最好睇埋官方網站或領事館指引。

2. 必須包括醫療費用及緊急支援服務
工作假期唔同普通旅遊，因為你會喺當地工作，受傷風險自然高啲。根據消委會調查，市面上部分保險計劃每年保費由港幣$1,856至$5,850不等，保障範圍差異好大。

最基本要有：

• 緊急醫療運送（例如救護飛機、救護車）
• 送返原居地（例如返香港）
• 手術、住院、覆診費用（部分計劃包返港後30日至3個月內）

3. 包括個人意外及責任保障
如果你喺旅程中因意外導致死亡或永久傷殘，而保險冇包「個人意外」，你將無法獲得任何賠償。消委會指出，部分計劃最高賠償可達港幣$780,000。
另外，「個人責任」保障亦好重要，例如你喺工作期間不小心令他人受傷或財物損毀，保險可以幫你承擔部分法律責任。

4. 留意工作類型是否受保
唔係所有工作都受保！以下職業通常唔包喺工作假期保險入面：

• 職業性運動員或比賽參加者
• 電影／電視拍攝工作人員
• 導遊、領隊
• 交通工具司機（如巴士、貨車）
• 潛水員、保安員
• 賭場、地盤、夜總會工作者

📌 小貼士：如果你計劃從事以上類型工作，一定要向保險公司查清楚，唔好以為「包晒」就萬無一失。

5. 保障期要夠長，唔好中途斷保！
一般旅遊保險最多保障90至180日，但工作假期通常長達一年甚至兩年。如果你買咗短期保險，過咗期限就唔再受保，萬一出事就要自己承擔。
📌 小貼士：選擇專為工作假期設計、保障期達一年或以上嘅保險計劃。

6. 行李及財物損失保障
唔少人忽略咗財物保障，但其實喺外地生活，行李被盜、手機損壞、電腦遺失都好常見。
📌 小貼士：選擇有涵蓋行李遺失、損壞、被盜等情況嘅保險，保障金額由數千至數萬港元不等。

7. 當地法律支援服務
喺外地萬一遇上法律糾紛（例如交通意外、租屋爭議），有法律支援可以幫你搵律師、提供諮詢。
📌 小貼士：選擇有提供法律支援或法律費用保障嘅保險計劃。

8. 學業中斷保障（如有進修）
如果你計劃喺工作假期期間報讀課程，記得查清楚保險有冇涵蓋「學費損失」保障，例如因病或意外未能完成課程。
📌 小貼士：部分保險計劃會賠償未能出席課程所損失嘅學費。

9. 紅色／黑色外遊警示保障
如果你去嘅國家突然發生政治動盪或天災，政府發出外遊警示，有啲保險計劃會提供旅程取消或中斷保障。
📌 小貼士：選擇有涵蓋「外遊警示」情況嘅保險，避免臨時改行程要自費。

出發前Checklist
✅ 查清楚目的地簽證要求
✅ 比較唔同保險計劃保障範圍
✅ 睇清條款，唔好只睇價錢
✅ 簽約前問清楚「唔受保」項目
✅ 保留所有保單文件及聯絡方式

出發前唔好只睇保費幾多，最重要係睇清楚保障範圍、受保工種、保障期長短、索償流程同埋有冇支援服務。唔好等出事先發現「原來唔包」！工作假期係一次難得嘅人生體驗，但保障自己更加重要。唔好等出事先後悔，出發前做足功課，買啱保險，先可以安心探索世界！

文：阿飛＠ECjobsonline 編輯部