打工仔每日都忙到甩轆，未做完一樣，第二、第三樣已經排住隊。偏偏老細好似冇時差，隔一陣就問：「搞掂未呀？」本身唔忟都畀佢chur到忟。但你又唔可以兜口兜面話「未做完」，咁可以點婉轉啲回應，又唔會激親佢呢？以下5招語言偽術，幫你穩陣過關！

1. Yes but no：先認同再轉彎
呢招好似考Speaking咁，先話「搞掂啦」，再補一句：「但我想再double check啲細節」、「等埋個同事confirm就可以交」。老細聽落會覺得你已經完成咗，只係想做得更好，唔會即刻扯火。

2. 美化語言：避開「差唔多」陷阱
千祈唔好講「差唔多做完」、「未搞掂」呢啲trigger字眼。改講「大致完成」、「執埋啲濕碎位就交得」，聽落專業又有誠意，老細都唔會即刻發難。

3. 轉移視線：請教老細反客為主
如果真係未搞掂，可以話：「有啲位唔太明，想請教你意見。」老細一聽你請教佢，梗係即刻老屎忽上身，滔滔不絕講一輪。你成功轉移焦點之餘，仲爭取到更多時間慢慢搞掂。

4. Email術語：英文高級啲，睇落做完咗
老細用email問你就更好發揮，可以用「virtually done」、「essentially complete」、「practically ready」等字眼，睇落好似已經完成晒，其實仲有啲尾未執。比起「almost done」更高級、更穩陣。

5. 模糊回應：答到好似冇答過
有時老細問得太密，你可以用模稜兩可嘅方式回應，例如：「進度順利，稍後會交」、「已處理大部分，等緊最後確認」。聽落好似有交代，但又冇講死時間，成功拖延又唔失禮。

結語：語言藝術，職場生存術
老細日日check住你進度，其實唔係得閒，而係佢有壓力要交代。但你都唔使太認真，識講嘢就係職場生存關鍵。語言偽術唔係呃人，而係幫你爭取空間、減少誤會，做個聰明打工仔！

文：Noelle＠ECjobsonline 編輯部