唔少打工仔一到某個階段就會諗：「係咪時候轉工？」可能係做得唔開心、冇前景、或者純粹想換個環境。但轉工唔係一時衝動，更加唔係逃避現狀咁簡單。真正值得轉工，係因為你諗清楚、睇透形勢、為自己未來鋪路。

以下5個問題，幫你冷靜分析，睇清楚自己係咪真係準備好轉工。

1. 你係咪一時衝動？
畀老細鬧、同同事嗌交、公司換咗新管理層、客戶被搶走——呢啲都會令人心情差。但係，情緒一時，辭職一世。瞓醒一覺可能就冇事，唔好因為一時唔順就放棄份工。

2. 你份CV係咪越嚟越短？
轉工唔係壞事，但如果你每份工都做唔夠一年就走人，HR睇你履歷都會皺眉。會唔會其實問題唔係公司，而係你自己抗壓力低、EQ唔夠、唔識合作？

3. 你搵到新工未？
除非你已經有offer在手，否則唔好輕易遞信。求職市場唔係你話有就有，Send幾十封CV都可能冇回音。唔想變雙失青年，就要穩陣啲。

4. 新工真係比舊工好？
人工低咗、發揮空間細咗、晉升機會少咗——咁轉嚟做咩？唔好為咗「轉」而轉，要轉就轉得有意義，幫到你向前行。

5. 老細有冇想挽留你？
如果你遞信後，老細主動加人工留你，咁不妨再觀察多一排。始終錢係打工仔最大動力，既然有人肯投資你，你都可以再比機會自己。

最後提醒：
轉工唔係衝動消費，要諗清楚、睇遠啲。問清楚自己以上5個問題，先至係對自己負責。唔好因為一時唔順就改變人生軌跡，職場路長，穩陣行先！

文：Noelle＠ECjobsonline 編輯部