燒味可以話係香港地道飲食文化嘅代表之一，無論係茶餐廳嘅燒味飯，定係街坊「斬料加餸」返屋企，叉燒、燒鴨、乳豬等都係港人至愛。唔少旅客嚟香港都會特登試一試呢啲「名物」。但你又知唔知，燒味背後其實暗藏高鈉高脂危機？

消委會實測：33款燒味鹵味屬「高鈉」食品
消費者委員會聯同食物安全中心早前測試市面100款燒味及鹵味樣本，包括叉燒、乳豬、燒肉、燒鵝、燒鴨、豉油雞、鹵水鵝、鵝腸、鵝腎及紅腸。結果發現有33款樣本每100克含鈉超過600毫克，屬「高鈉」水平。

世界衛生組織建議，成年人每日鈉攝取量應少於2,000毫克。過量攝取鈉會增加患上高血壓、心臟病、中風及腎衰竭等慢性疾病風險。

鈉含量排行榜：紅腸、燒肉、叉燒最鹹！

測試結果顯示，紅腸平均每100克含1,000毫克鈉，成為「鹹王」；其次係燒肉（870毫克）及叉燒（660毫克）。以下為各款燒味／鹵味平均鈉含量排名：

紅腸之所以鈉含量特別高，係因為佢屬加工食品，由製造商統一供應，難以控制鹽分。而燒肉飯平均鈉含量高達1,500毫克，叉燒飯亦有1,100毫克，相當接近每日上限。相比之下，燒鵝飯平均只有330毫克，相對「清淡」。

醬汁加鈉量驚人！叉燒汁鹵水汁唔好亂淋
如果你以為唔加餸汁就冇問題，就要留意啦！測試發現，叉燒汁每100克含1,600毫克鈉，鹵水汁更高達2,200毫克。淋汁後，叉燒鈉含量會增加17%，鹵水鵝更誇張，鈉含量暴升38%。
所以如果真係忍唔住想食燒味，記得叫店員「唔要汁」，或者將醬汁分開上，自己控制用量。

燒鵝乳豬脂肪爆表！每100克等於7茶匙油
除咗鈉，脂肪含量都唔可以忽視。燒鵝同乳豬樣本平均每100克分別含37克及36克總脂肪，相當於7茶匙食油。根據世衛建議，成年人每日總脂肪攝取量應少於66.6克。
其他高脂燒味包括鹵水鵝、燒肉、燒鴨，每100克脂肪含量都超過20克，屬高脂食品。長期攝取過量脂肪，會增加肥胖、心血管疾病風險。

消委會建議：食得精明啲！
為咗減低健康風險，消委會提出以下貼士：

• 食雞記得去皮，減少脂肪攝取。
• 點汁前先試味，唔好一開始就淋滿飯。
• 保持均衡飲食，唔好餐餐燒味飯。

燒味雖然好味，但健康先至最重要。下次食燒味，不妨諗多一步，揀啱款式、控制份量、減少醬汁，食得開心又安心。

文：Silver＠ECjobsonline 編輯部