日日返工面對老細同客戶，壓力爆煲、情緒起伏好正常。根據一項2025年香港職場壓力調查，有超過 68% 打工仔表示每星期至少有兩日感到情緒困擾。但你又知唔知，情緒唔止影響心情，仲會直接傷害你身體器官？中醫理論稱之為「內傷七情」，即喜、怒、憂、思、悲、恐、驚七種情緒，過度波動會擾亂氣血運行，損害五臟六腑。

以下就等我哋逐一拆解，邊種情緒會影響邊個器官👇

1. 喜 → 心臟
開心係好事，但過度興奮就會「心火旺」，影響心神安寧。中醫認為「喜傷心」，會導致失眠、多夢、心悸，甚至神志不清。
📝 小貼士：睇完演唱會high完唔瞓得？記得做深呼吸、靜坐平復情緒，幫心臟降降溫。

2. 怒 → 肝臟／脾胃
「怒傷肝」，發脾氣會令肝氣上逆，導致頭暈、血壓升高、消化不良。長期壓抑情緒，仲會影響脾胃功能，出現胃痛、腹脹等問題。
📝 小貼士：遇到激氣事，不妨行一圈、深呼吸，或者寫低情緒釋放出嚟，唔好硬撐。

3. 哀／悲 → 肺部／大腸
「悲傷肺」，過度悲傷會令肺氣虛弱，出現氣短、胸悶、呼吸不順；同時亦會影響大腸功能，增加患上腸道疾病風險。
📝 小貼士：唔開心可以喊，但唔好長期壓抑。搵朋友傾吓、做吓運動，有助疏導情緒。

4. 思／多慮 → 脾胃
「思傷脾」，諗得太多、過度焦慮會令脾胃運化失調，出現食慾不振、腹瀉、疲倦等症狀。
📝 小貼士：每日預留10分鐘靜觀或冥想時間，幫助大腦放鬆，減少過度思慮。

5. 恐懼／驚慌 → 腎臟
「恐傷腎」，長期處於驚恐狀態會損害腎氣，導致腰痠、尿頻、易疲倦，甚至影響記憶力。
📝 小貼士：建立安全感、規律作息、避免過度驚嚇，有助保護腎氣。

管理情緒 = 保護內臟健康
中醫強調「情志內傷」，即情緒失衡會導致內臟功能失調。想身體健康，唔止要食得好、瞓得夠，情緒管理都一樣重要。唔妨當係訓練EQ，幫自己建立更強嘅心理免疫力！

文：Noelle＠ECjobsonline 編輯部