「啊B點呀？餵咗奶未？」

「放咗學睇半個鐘電視好啦」

「你開始做功課未？我返嚟前要做好一半呀」

呢啲對白，你可能講過、聽過，甚至每日都講緊。生活喺香港，雙職父母早已成為常態。根據統計，香港有超過48萬個雙職家庭，意味住每兩個家庭就有一個爸媽都要返工。每日24小時，扣除工時、交通、家務，留畀子女嘅時間所剩無幾。

但親子關係唔一定靠長時間堆砌，重質唔重量。只要用心經營，短短幾分鐘都可以建立深厚連結。以下三個方法，幫你喺繁忙中都可以做個有溫度、有連結感嘅父母：

1. 身體接觸最能表達對仔女嘅關懷
   唔少人都聽過：「一個擁抱比千言萬語都溫暖」 (Sometimes a hug is worth more than a thousand words)。研究指出，擁抱能釋放催產素，有助建立安全感與親密感。無論BB定中學生，適當嘅身體接觸都能令子女感受到你嘅關愛與支持。返到屋企，拍拍膊頭、抱一抱、講句「辛苦晒」，已經足夠窩心。
   
   
2. 家長主動分享，打開對話之門
   接近6成家長表示難以與子女溝通，但其實溝通係雙向。唔好等仔女開口，父母都可以主動分享自己工作上嘅小故事、情緒或趣事。例如：「今日老細讚咗我，我好開心，覺得自己好有價值。」呢啲分享唔止拉近距離，仲教識子女點樣表達感受。
   
   分享時可留意五個元素：人物、事情、原因、感受、期望。例如：「今日媽媽嘅同事同我講多謝，因為我幫咗佢處理一件緊急事，我好高興，幫到同事好有滿足感，而且同學對我多一份信任。」分享完可以鼓勵子女講返自己發生嘅事，互相了解更容易打開話題。
   
   
3. 雙職父母宜分工合作，多參與子女生活
   超過七成家庭依賴外傭照顧子女，但父母角色無可取代。即使每日只得幾分鐘，都可以做以下小事：每日放學打個電話問候、睇一次功課簿、參加一次學校活動、一齊食一餐飯。研究顯示，每週至少一次家庭活動，有助提升子女幸福感與自信心。
   
   現今有不少照顧者代替父母參與親子活動，例如運動會或學校旅行日。呢啲經歷會影響子女同父母嘅親密度，甚至父母喺仔女心目中嘅定位。所以忙歸忙，唔好忘記子女嘅成長路需要你嘅足印。

親子關係唔靠時間堆砌，而係靠心思經營。你願意由今日開始，做個更有連結感嘅爸媽嗎？

文：Susanna＠ECjobsonline 編輯部