11月18日晚上，全球多個網站突然無法連線，包括Discord、DoorDash、Crunchyroll、ChatGPT等，原因係Cloudflare出現技術故障，導致網絡中斷。事件一度引起全球用戶關注，官方其後表示問題源於網絡設定錯誤，已即時修復。

但最爆笑嘅唔係死機本身，而係有網民喺Threads上發文：「在 #Cloudflare 當系統工程師的第一天 😍 祝我好運」，結果引來大量網民留言：

• 「老兄你第一天上班就把整個網路搞垮了」
• 「你第一天上班就關掉了三分之一的網路。最好另謀高就」
• 「去你的，你做了什麼，搞到整個網路都掛了 xD」

一個無心祝福，變成全網爆笑。雖然呢位新同事未必真係「撳錯掣」嗰位，但佢嘅留言完美演繹咗打工仔嘅職場荒謬感——有時你未出手，已經中咗招。

第一日返工撞正大事，點應對？

• 保持冷靜，唔好自責：大型系統出事唔係一個人搞出嚟，尤其你仲未有權限。
• 主動了解情況：即使唔係你搞出嚟，都可以主動學習處理流程，對未來有幫助。
• 幽默感係生存之道：識得自嘲，反而更容易融入團隊，建立人際關係。
• 記住呢一日：將來你會發現，呢啲「災難級」經歷，往往係你職場故事入面最精彩嘅一章。

第一日返工就撞正全網死機，雖然驚，但都係一種「職場洗禮」。唔少人都試過第一日返工就撞正大project、大客戶、或者大災難——你唔係一個人。最緊要係識得應對、識得笑住面對，咁你就已經贏咗一半。

文：Jamie＠ECjobsonline 編輯部