HR每日要處理幾十甚至過百份求職申請，根本冇可能逐字逐句細讀。大多數情況下，佢哋只會用 一分鐘甚至更短時間快速掃描你的履歷，決定有冇面試機會。想避免「過目即忘」，就要留意以下四大常見問題。

1. 相片不當
雖然見工唔係選美，但相片往往影響第一印象。有啲人因為冇最新相片，就隨便放一張「咸豐年代」舊照。結果HR可能覺得你老土，甚至認為你冇誠意。事實上，CV相片並非必需，除非公司明確要求；否則只有在你覺得相片能加分時，先至值得放上去。

2. 資料不完整
履歷必須包含基本資料：姓名、出生年月日、住址、聯絡電話、電郵；再加上最新工作經驗、學歷、技能及獎項。呢啲資料係HR判斷你是否合適的基礎，缺漏任何一項，都可能令你直接被跳過，失去面試機會。

3. 亂填待遇
薪酬期望雖然唔一定要寫，但如果招聘方要求填寫，就要小心。亂開天價只會令HR覺得你對行業冇認識，缺乏誠意同能力。根據香港勞工處數據，2024年大學生平均起薪約為 HK$16,000–18,000，如果你隨便填六位數字月薪，履歷自然會被淘汰。

4. 錯誤太多
拼字、文法、標點、格式錯漏百出，會令HR質疑你嘅專業度。現時網上有大量履歷範本同字典工具，錯誤完全可以避免。如果連CV都寫得錯漏百出，HR只會擔心你入職後會「錯到拆招牌」。

HR睇CV嘅時間非常有限，任何細節都可能決定你有冇面試機會。避免以上四大問題，認真準備履歷，先至能夠突圍而出，爭取到見工機會。

文：Jamie＠ECjobsonline 編輯部