講到冬天香港人最鍾意嘅活動，非打邊爐莫屬。凍到流鼻水嘅天氣下，同親朋好友圍埋一枱，烚響鈴、肥牛，真係暖笠笠又幸福。不過，邊爐食得多唔止「熱氣」，仲容易增磅同影響健康。想食得開心又食得健康，就要記住以下四個要點。

1. 湯底要清淡，多落蔬菜
湯底係打邊爐嘅靈魂。想鮮甜又健康，最好揀蔬菜湯底，例如蕃茄粟米湯酸酸甜甜好開胃，芫茜皮蛋湯清熱降火。唔好貪方便買湯料包，因為加工食品通常高鈉重味精。仲要避免濃味湯底，好似麻辣湯，油量驚人。烚太多肉仲會令湯底更油膩，到時就唔好狂飲個湯啦。

2. 配料要慎選
記住「多菜少肉」。先食蔬菜同菇菌類，纖維有助腸道健康，又可以打底避免暴食。肉類方面，揀瘦牛肉、雞柳、魚肉等低脂選擇。加工同油炸食品雖然好味，但高鈉高脂，最好「一件起兩件止」，例如腸仔、午餐肉、響鈴，食多咗真係傷身。

3. 食物要吹涼先入口
打邊爐熱氣唔單止因為湯底同油炸配料，食物溫度都係關鍵。好多時淥完就即刻入口，溫度過高會傷口腔黏膜，容易生飛滋，仲增加口腔癌風險。食道同腸胃承受唔到高溫亦會受損，增加患病機會。所以記得吹涼少少先食。

4. 食到七成飽就收手
同朋友打邊爐最易食到唔停手。要控制份量，避免眼闊肚窄。研究指出，慢慢咀嚼、食到七成飽最健康，腸胃有足夠時間消化，人亦精神啲。食到過飽反而腸胃負擔重，仲會覺得攰，得不償失。

冬天打邊爐固然幸福，但只要留意以上四點，就可以同親朋好友食得開心又健康。