面試往往係打工仔最頭痛嘅一環，但美國32歲項目經理 Kendall McGill 卻有一招「屈機秘技」：一份沿用足足八年嘅「5分鐘簡報」。靠住呢份簡報，她不單止多次成功跳槽，最近仲喺公司內部轉職，加薪5%，引起全球打工仔熱議。

一份簡報用足八年　次次面試得米
McGill 自2018年開始，每次面試都會亮出呢份簡報。內容結構清晰，先解釋自己點解係最佳人選，再用 STAR 格式（情境、任務、行動、結果）展示過往成果。為經歷加上搶眼標題，例如「高壓環境與強勢人格」，令面試官留下深刻印象。最後，她更附上「30、60、90天計劃」，向主管展示入職後嘅清晰目標。她透露，每次面試前都會主動要求分享螢幕，至今從未被拒絕。

面試官實食冇黐牙　三大心法突圍
McGill 認為，簡報能幫助自己保持冷靜，有條理地表達，避免因緊張而失準。其次，極少人會準備完整簡報，呢種做法能令自己瞬間脫穎而出。最關鍵嘅一步係，每次面試後，她都會喺感謝電郵中再次附上簡報同履歷，展現誠意同準備充足，令主管更容易記住佢。

打工仔必學的「必殺技」
靠住呢份「神級PPT」，McGill 八年間屢屢獲得工作機會，今次更成功加薪。佢提醒打工仔：「你唔可能只靠一次面試就成功，但每一次都要拿出最好狀態，不斷嘗試，最後總會有結果。」呢份堅持同準備，或許先係打工仔最值得學習嘅「必殺技」。

文：Yvonne＠ECjobsonline 編輯部

延伸閱讀：
STAR 「星級面試技巧」你要知