打工仔搵食有得艱難？歌都有得你唱啦！「半斤八兩，做到隻積咁嘅樣！」但其實做到隻積咁嘅樣會係咩樣呢？點解要係積呢？坊間仲有好多好有趣嘅職場術語，你又識唔識得曬呢？

今日就同大家一齊【笑談廣東話】，完美融合香港本土文化與辦公室血淚史，拆解以下 5 大最經典的打工仔專用術語！

1. 做到隻積咁嘅樣 (意思：工作壓力大、極度勞碌)
呢句術語係源自 1976 年的一套喜劇《半斤八兩》的主題曲《半斤八兩》，曲詞皆由許冠傑所創作。到底點解係「積」？坊間有兩個最廣泛通傳的講法：

• 啤牌中的 Jack： 因為啤牌入面嘅 Jack（譯作「積」）可指僕人和雜工，「做到隻積咁嘅樣」即係話打工仔做到好似僕人、雜工咁辛苦。
• 千斤頂 (Car Jack)： 由於「積」係英文 Jack（千斤頂）嘅諧音，所以啲人就話打工仔好似用嚟舉起重物進行維修嘅千斤頂一樣，反映佢哋工作壓力大、工作量過多。

2. 做到隻屐咁 (意思：疲於奔命、頻頻撲撲)
「積」都話講得通，但打工仔點會做到似隻鞋（屐）咁呢？
原來係因為打工仔做嘢成日都要頻頻撲撲，疲於奔命。以前着木屐行路會發出「踢撻」聲，就好似打工仔四圍走動忙碌嘅節奏，所以就有咗呢個說法，話打工仔做到成隻屐咁！

3. 做到隻狗咁 (意思：生活苦悶、工作極度勞累)
呢句應該大家都聽得多，但點解要係狗呢？大家都心知肚明，其實狗嘅生活都唔係好辛苦啫！比起打工仔日日朝 9 晚 6 加 OT，做狗都不知幾幸福。
其實「做到隻狗咁」呢個說法，係源自西方嘅。西方有一個講法叫 "it's a dog's life"，即係過住狗一般嘅日子，形容生活苦悶。連英國經典樂隊披頭四 (The Beatles) 都喺歌曲 “A Hard Day's Night" 入面唱到：

"It's been a hard day's night, and I've been working like a dog."

首歌唱到街知巷聞，唔怪得中國人都要將佢譯返做中文，話打工仔做到成隻狗咁啦！

4. 燉冬菇 (意思：降職 / 降級)
大家都知「燉冬菇」有「降級」嘅意思，但點解會係「冬菇」呢？
原來呢個 term 係源自警察呢個行業。早年香港華籍警員嘅警帽，係沿用清朝軍帽嘅款式，形狀似足冬菇。若高級啲嘅便衣警察被降職，佢哋就要做返軍裝警察，戴返頂冬菇警帽。而「燉」係「退」嘅諧音字，降職於是乎就叫「燉冬菇」喇！

5. 炒魷魚 (意思：被老闆解僱)
學生哥最怕食東星斑，咁打工仔一定最怕老細請食豉椒炒魷喇！點解解僱會叫「炒魷魚」架呢？
咁係因為炒過嘅魷魚會捲埋攣起，十足十古人出遠門用嗰啲包袱咁樣。所以啲人就用「炒魷魚」嚟形容老闆解僱員工，叫對方「執包袱」走咁解。

廣東話博大精深，唔止職場術語，坊間仲有好多好鬼馬、好耐人尋味嘅歇後語或俗語，等住大家慢慢去發掘架！

文：Noelle@ECjobsonline編輯部