人大咗，以為出嚟社會做嘢就可以賺錢買花戴、隨心所欲？現實話你知：諗多咗啦！好多打工仔返工之後，先發現自己被一大堆「自古以來」嘅辦公室文化同職場潛規則綁死。以下盤點 8 個最令香港打工仔頂唔順、完全唔明存在意義嘅 Office 奇特規矩，睇吓邊個最戳中你心聲！

1. 職場外表歧視？女仔返工一定要化妝？

明明自己素顏個樣乾乾淨淨、又唔係唔見得人，都唔明點解返工一定要化妝！日日厚粉搞到啲皮膚差晒，化妝品又貴，朝早仲要早起梳洗打扮，真係少啲耐性都頂唔順。其實我又唔係靠塊面搵食，化妝呢件事，可唔可以放過大家？

不過，香港好多公司都係「外貌協會」，你唔化妝，喺老老細同客心目中已經大打折扣，分分鐘覺得你唔尊重份工、無厘精神。這種職場外貌焦慮再咁落去，遲下可能冇整過容都唔請人添啊！

2. 辦公室衣著迷思：Smart Casual 變相要着全套老西

公司員工守則指引寫就寫「Smart Casual（時尚便服）」，但其實只係一個籠統嘅講法，大把公司本質上咪又係要你着全套老西返工！

特別係男士們，大熱天時成 30 幾度，依然要恤衫、長褲加西裝褸上陣，唔熱到中暑都奇！其實 Outlook（外表）係咪真係咁緊要？除咗見客、見工或者同大老細開會，平時喺自己位做嘢，返工衫係咪可以 Casual 啲？老實講句，我唔着西裝褸都可以好 Smart 啫！

3. 返工無謂 OT！無意義嘅「鬥遲放工」大賽

大佬，我已經做足 9 個鐘，嘢又做晒，想準時收工返屋企食餐安樂茶飯啫。點解成班同事硬係要扮勤力，冇 8 點都唔肯執包袱走人？

你哋一個二個賴死唔走，搞到成個 department 冇人敢帶頭走。想博上位、博上司賞識都唔好搞着其他人啦？放工時間係公司訂嘅，一夠鐘員工理直氣壯咁離開係天經地義，冇話邊個遲走就代表勤力啲。其實你哋咁晏都唔走，係咪工作效率低做唔晒咋？唔好扮啦！

4. 學歷刻板印象：名校生就一定叻啲？

「讀哈佛、牛津、香港三大就一定勁啲？」唔好咁多 Stereotype（刻板印象）啦！

出得嚟做嘢，個個都係由低做起，冇話讀番書就一定人工高啲、能力強啲。職場上嘅機會始終要靠自己爭取，向上司證明你嘅實力，總比盲目比較學歷嚟得實際。做老細嘅都應該多方面考慮員工表現，唔好因為一張畢業證書而有所偏頗。

5. 職場小圈子：有人的地方就有 Office 政治

其實 Office 係咪一定要搞分化、爭客、玩小圈子、分敵我、鬥嚟鬥去？

與同事人際關係之間就真係冇可能發展到純友誼？難道大家就唔可以和平溝通、合作相處？同一個部門，與其Office政治內鬥鬥到個人咁 Chur，不如大家畀心機做嘢、互相幫忙，一齊為公司出一分力，最緊要係一齊平平安安準時收工！

6. 職場上位厚黑學：想升職攞着數就一定要「埋堆」？

喺好多公司，工作想如魚得水，靠嘅唔係實力，而係靠職場人際關係、要識得向高層靠攏同「埋堆」。呢個諗法有冇再 Out 啲？

正常人出嚟打工，付出幾多就應該有幾多回報。升職加薪從來都應該靠真材實料，而唔係靠攀附關係、拍馬屁。

7. 上司下屬關係變質：一升職就「六親不認」擺老細款

有啲原本好 Friend、好傾得埋嘅同事，一升咗做主管級管理層就反面唔認人，洗唔洗做到咁絕啊？

其實做管理層都唔一定要擺個老細款出嚟嚇人嘅，做個好上司一樣可以同下屬打成一片，唔需要下下扮惡、避嫌避到好似陌生人咁。本身係「Friend 底」嘅就更加唔洗咁克制，有料嘅自然升到，如果冇料嘅，24 小時黐住你都冇用啦，唔洗下下猜忌同事想博着數。

8. 侵犯員工私隱？令人窒息嘅「家庭日」兼查家宅

曾幾何時，有啲公司好鍾意搞家庭日，鼓勵同事帶埋屋企人參加 BBQ、玩遊戲、大抽獎，表面上係互相認識。更誇張嘅係，甚至有老細會提出要去探訪員工家人。

今時今日仲當大家係小學生、玩父母家長日咩？大家都係打份工，返工出賣勞動力，放工就係私人時間，真係唔洗「查家宅」查到咁深入啊嘛？

面對職場潛規則  打工仔如何自處？

每個地方都有佢嘅慣性文化或者潛規則，辦公室亦唔例外。香港打工仔日常要頂住沉重嘅工作量、又要應付無謂嘅 返工OT 壓力，仲要頂埋呢啲令人費解嘅 Office文化，真係搵食艱難。

不過，幾難頂大家都頂咗咁耐。各位打工仔繼續爭氣，裝備好自己嘅實力。只要你嘅專業無可取代，理得佢咩潛規則，總有一日會有出頭天！

文：Noelle@ECjobsonline編輯部