香港人平時最鐘意去旅行，搭飛機就好似食生菜咁平常，大家又識唔識航空業界的術語呢 ? 以下有部份由空姐分享嘅術語都幾有趣架 ! 以後聽到啲空中服務員傾計，就知佢地講緊乜啦！
 
1. 大柴 = 國泰航空
就如警察職位的高與低，睇一睇他/她的肩章就一目了然，而專屬警長級的兩條橫間肩章在坊間就有「大柴」之稱。由於國泰航空以前綠白間的標誌似足警長肩章，從此就有大柴呢個稱呼。
 
2. 飛餐 = 以最快速度完成工作
「飛餐」用作描述機組人員要以光速將餐點「飛」到乘客手上，多在沒有餐點選擇的情況下，空中服務員便會「飛餐」，為求以最快速度完成工作。
 
3. BC = 初級空中服務員
BC於國泰航空嚟講，即 Bar & Cabin，初級空中服務員，比個簡稱佢又真係易記好多嘅 !
 
4. 大家姐 = 航班服務經理
大家姐，顧名思義就係大姐大，係大家的leader，因此，女空中服務員之首，即航班服務經理，都會被稱作「大家姐」，睇住啲細嘅BC。
 
5. 菠蘿 = 馬可孛羅會會員
菠蘿為馬可孛羅會(Marco Polo Club) 的諧音，航空業人員多以「菠蘿」稱呼頭等艙或商務客位的國泰尊貴會員。
 
6. 報紙更 = schedule緊湊
「報紙更」是國泰航空的工作人員較常用的術語，主要是形容更表排得密密麻麻，成份報紙咁，唔知各位打工仔係咪都有一份「報紙」呢 ?
 
7. 哪渣飛 = 廉價機票
「哪渣飛」同樣為國泰航空人員較常用的術語，空姐會稱最平、最cheap，又諸多限制的機票為「哪渣飛」。
 
8. Deadhead = 第一程休息，第二程才工作
 Deadhead的意思即係空姐要返工，不過喺去程或第一程時不需要工作，只會好似普通客人咁坐喺度，等到回程或第二程才投入服務工作。
 
9. 飛機有蛇 = 機件故障，延遲起飛
聽到啲機組人員話「飛機有蛇」，大家唔洗咁驚住，佢地只不過係想講飛機的機件有問題，航班未能按照原定時間起飛姐 ! 不過我諗大家都慣左「飛機有蛇」，要delay架啦 !
 
10. 財叔 = 棺材
唔好以為有個財字就一定係同錢銀有關，有邊個有錢佬上左機，其實只係因為棺材個「材」字唔吉利，所以先取其諧音用個「財」字。為免乘客知道航班上載有棺木，機組人員都會以「財叔」代稱，始終出門遠行都係吉利啲好 !
 
香港地各行各業都有其術語，全部都好有創意又易記，真係可以話係香港特色之一啊！